| ஆறாம் பத்து | ஆறாம் பத்து |
| காக்கைபாடினியார் நச்செள்ளையார் | காக்கைபாடினியார் நச்செள்ளையார் |
| # 51 பாட்டு 51 | # 51 பாட்டு 51 |
| துளங்கு நீர் வியல்_அகம் கலங்க கால் பொர | அசைகின்ற நீரையுடைய அகன்ற கடற்பரப்பு கலங்கும்படி காற்று மோதுவதால் |
| விளங்கு இரும் புணரி உரும் என முழங்கும் | ஒளிவிட்டு எழுகின்ற பெரிய அலைகள் இடி போல முழங்கும் |
| கடல் சேர் கானல் குட புலம் முன்னி | கடலைச் சேர்ந்த கடற்கரைச் சோலையுள்ள மேற்கு நிலப்பகுதியை நோக்கிச் சென்று, |
| கூவல் துழந்த தடம் தாள் நாரை | பள்ளங்களில் மீனைத் தேடித் துழாவிய பெரிய கால்களையுடைய நாரை, |
| குவி இணர் ஞாழல் மா சினை சேக்கும் | குவிந்த பூங்கொத்துகளையுடைய ஞாழல் மரத்தின் பெரிய கிளையில் சென்றுதங்கும்,ழ்ர் |
| வண்டு இறைகொண்ட தண் கடல் பரப்பின் | வண்டுகள் தங்கியிருக்கின்ற குளிர்ந்த கடற்பரப்பில், |
| அடும்பு அமல் அடைகரை அலவன் ஆடிய | அடம்பங்கொடிகள் நெருங்கி வளர்ந்த இறுகிய கரையினில் நண்டுகள் ஊர்ந்துதிரிந்ததனால் ஏற்பட்ட |
| வடு அடு நுண் அயிர் ஊதை உஞற்றும் | சுவடுகளை அழிக்கும்படியாக நுண்ணிய குறுமணலை ஊதைக் காற்று வீசியெறியும் |
| தூ இரும் போந்தை பொழில் அணி பொலிதந்து | தூய்மையான பெரிய பனைமரத் தோப்பினில், அலங்காரத்தால் பொலிவுற்று விளங்க, |
| இயலினள் ஒல்கினள் ஆடும் மட மகள் | நடந்துகொண்டும், நடுங்கிக்கொண்டும் ஆடுகின்ற இளைய மகள் |
| வெறி_உறு நுடக்கம் போல தோன்றி | தெய்வம் ஏறும்போது வளைந்து வளைந்து ஆடுதல் போன்று தோன்றி, |
| பெரு மலை வயின்_வயின் விலங்கும் அரு மணி | பெரிய மலையின் இடங்கள்தோறும் குறுக்கிட்டு ஓடும், அரிய மணிகளைக் கொண்ட, |
| அர வழங்கும் பெரும் தெய்வத்து | பாம்புகள் நடமாடும் பெரும் தெய்வங்கள் உறையும் இமயமலை, |
| வளை ஞரலும் பனி பௌவத்து | சங்குகள் ஒலிக்கும் குளிர்ந்த பெருங்கடல், |
| குண குட கடலோடு ஆயிடை மணந்த | கிழக்கிலும், மேற்கிலும் கடல்கள் ஆகிய இவற்றிடையே உள்ளோர் கூடிச் சேர்ந்த |
| பந்தர் அந்தரம் வேய்ந்து | பந்தலின் உள்புறத்தை வேய்ந்தாற்போல, |
| வண் பிணி அவிழ்ந்த கண் போல் நெய்தல் | வளமை மிக்க மலர்ந்த கண்போன்ற நெய்தல் மலர்கள் |
| நனை உறு நறவின் நாடு உடன் கமழ | தேனைக் கொண்ட நறவம் பூக்களோடு, நாடு முழுவதும் மணங்கமழ, |
| சுடர் நுதல் மட நோக்கின் | ஒளி திகழும் நெற்றியினையும், கபடமற்ற பார்வையினையும், |
| வாள் நகை இலங்கு எயிற்று | மிகுந்த ஒளியினால் பொலிவுபெற்ற பளிச்சிடும் பற்களையும், |
| அமிழ்து பொதி துவர் வாய் அசை நடை விறலியர் | அமுதம் போன்ற மொழியினைக் கொண்ட சிவந்த வாயினையும், அசைகின்ற நடையினையும் உடைய விறலியரின் |
| பாடல் சான்று நீடினை உறைதலின் | பாடல்களை நிரம்பக் கேட்டு நீண்டநேரம் இருத்தலால் |
| வெள் வேல் அண்ணல் மெல்லியன் போன்ம் என | வெள்ளிய வேலினை ஏந்திய வேந்தன் மென்மையான இயல்பினன் போலும் என்று |
| உள்ளுவர்-கொல்லோ நின் உணராதோரே | நினைப்பார்களோ உன்னை நன்கு தெரிந்துவைத்திராதவர்கள்? – |
| மழை தவழும் பெரும் குன்றத்து | மேகங்கள் தவழும் பெரிய குன்றுகளில் வாழும் |
| செயிர் உடைய அரவு எறிந்து | வருத்துதலையுடைய பாம்புகளைத் தாக்கி, |
| கடும் சினத்த மிடல் தபுக்கும் | மிக்க சினத்தையுடைய அவற்றின் வலிமையை அழிக்கும் |
| பெரும் சின புயல்_ஏறு அனையை | பெரும் முழக்கத்தையுடைய மேகங்களினின்றும் இறங்கும் இடியைப் போன்றவன் நீ! |
| தாங்குநர் தட கை யானை தொடி கோடு துமிக்கும் | எதிர்த்துவரும் பகைவரின் பெரிய கையையுடைய யானையின் பூண் அணிந்த கொம்புகளை முறிக்கும் |
| எஃகு உடை வலத்தர் நின் படை வழி வாழ்நர் | வாளையுடைய வெற்றிவீரர்கள் உன் படையினில் வாழ்பவர்கள்; |
| மறம் கெழு போந்தை வெண் தோடு புனைந்து | வீரம் பொருந்திய பனையின் வெண்மையான தோடுகளால் செய்யப்பட்டு |
| நிறம் பெயர் கண்ணி பருந்து ஊறு அளப்ப | பகைவரின் இரத்தத்தால் நிறம் மாறிப்போன உன் தலைமாலையைப் பருந்துகள் கொத்திச் செல்ல நேரம் பார்த்திருக்க, |
| தூ கணை கிழித்த மா கண் தண்ணுமை | உன் வலிமையான அம்புகள் பாய்ந்து கிழித்த, பகைவரின் கரிய கண்ணையுடைய தண்ணுமையை, |
| கைவல் இளையர் கை அலை அழுங்க | இசைக்கும் தொழிலில் வல்ல இளையர்கள் கையால் தட்டி இசைப்பதைத் தவிர்க்க, |
| மாற்று அரும் சீற்றத்து மா இரும் கூற்றம் | மாற்றமுடியாத சீற்றத்தையுடைய கரிய, பெரிய கூற்றுவன் |
| வலை விரித்து அன்ன நோக்கலை | கொல்வதற்காக வலைவிரிப்பதைப் போன்ற பார்வையினை உடையவனே! |
| கடியையால் நெடுந்தகை செருவத்தானே | அச்சத்தையூட்டுகின்றாய்! நெடுந்தகையே! போர்க்களத்தில். |
| # 52 பாட்டு 52 | # 52 பாட்டு 52 |
| கொடி நுடங்கு நிலைய கொல் களிறு மிடைந்து | கொடிகள் அசையும் நிலையையுடைய கொல்லுகின்ற போர்யானைகள் நெருக்கமாகத் திரிவதால் |
| வடி மணி நெடும் தேர் வேறு புலம் பரப்பி | நன்றாக வடிவமைக்கப்பட்ட மணிகளைக் கொண்ட நெடிய தேர்களை வேறு இடங்களில் பரவச்செய்து, |
| அரும் கலம் தரீஇயர் நீர் மிசை நிவக்கும் | அரிய பொருள்களைக் கொணர்வதற்காக, கடலின்மேல் நிமிர்ந்து செல்லும் |
| பெரும் கலி வங்கம் திசை திரிந்து ஆங்கு | பெருத்த ஆரவாரத்தையுடைய கப்பல்கள் தத்தம் திசைகளில் திரிந்துகொண்டிருப்பதைப் போலப் படைகளை இயக்கி, |
| மை அணிந்து எழுதரு மா இரும் பல் தோல் | மழைமேகத்தை அணிந்துகொண்டிருப்பதைப் போல எழுந்துநிற்கும் கரிய, பெரிய பலவான கேடகங்களுடன், |
| மெய் புதை அரணம் எண்ணாது எஃகு சுமந்து | மெய்யை மறைக்கும் கவசங்கள் வேண்டுமென்று எண்ணாமல், வேல்களைச் சுமந்துகொண்டு |
| முன் சமத்து எழுதரும் வன்கண் ஆடவர் | போரின் முன்னணியில் நிற்கும் மனவுரம் மிகுந்த வீரர்களின் |
| தொலையா தும்பை தெவ்_வழி விளங்க | தோற்காத நிலையுள்ள தும்பைப்பூ மாலை, பகைவர் நடுவே விளங்கித் தோன்ற, |
| உயர்_நிலை_உலகம் எய்தினர் பலர் பட | விண்ணுலகை அடைந்தனராகப் பகைவர் பலரும் மடிய, |
| நல் அமர் கடந்த நின் செல் உறழ் தட கை | நல்ல போர்களைப் போரிட்டு வென்ற உன் இடி போன்ற பெரிய கை, |
| இரப்போர்க்கு கவிதல் அல்லதை இரைஇய | வேண்டிக் கைநீட்டுவோருக்காகக் கவிகிறதேயன்றி, பிறரிடம் வேண்டி |
| மலர்பு அறியா என கேட்டிகும் இனியே | உன் கைகள் விரிந்திருப்பதை அறியமாட்டா என்பதைக் கேள்விட்டிருக்கிறோம்; இப்பொழுது |
| சுடரும் பாண்டில் திரு நாறு விளக்கத்து | ஒளிர்கின்ற பாண்டில் விளக்கின் இறைத்தன்மை இனிமையாக வெளிப்படும் வெளிச்சத்தில், |
| முழா இமிழ் துணங்கைக்கு தழூஉ புணை ஆக | முழவு ஒலிக்கும் துணங்கைக் கூத்தில் தழுவியாடுவோருக்குத் துணையாக, |
| சிலைப்பு வல் ஏற்றின் தலைக்கை தந்து நீ | முழங்குகின்ற வலிமையான காளையினைப் போல, முதல்கை கொடுத்து, நீ |
| நளிந்தனை வருதல் உடன்றனள் ஆகி | பெண்களுடன் நெருக்கமாக நின்று சுற்றிவருவதைக் கண்டு, ஊடல்கொண்டவளாய், |
| உயவும் கோதை ஊரல் அம் தித்தி | அங்குமிங்கும் அலைப்பதால் வருந்தும் மாலையினையும், மேனியில் ஊர்ந்துநிற்கும் அழகிய தேமலையும், |
| ஈர் இதழ் மழை கண் பேர் இயல் அரிவை | ஈரப்பசையுள்ள இதழ்களைக் கொண்ட குளிர்ந்த கண்களையும், பெருமை பொருந்திய இயல்பினையும் உடைய உன் மனைவி |
| ஒள் இதழ் அவிழ் அகம் கடுக்கும் சீறடி | ஒளிவிடும் இதழ்கள் விரிந்த பூவின் உட்புறத்தைப் போன்ற சிறிய அடிகளில் அணிந்துள்ள |
| பல் சில கிண்கிணி சிறு பரடு அலைப்ப | பல மணிகளைக் கொண்ட இரண்டு சதங்கைகளும் தன் சிறிய கணுக்காலை வருத்த, |
| கொல் புனல் தளிரின் நடுங்குவனள் நின்று நின் | கரையை இடிக்கும் காட்டாற்று வெள்ளத்தில் நடுங்கும் தளிரைப் போல, கோபத்தால் மேனி நடுங்க நின்று, உன்மீது |
| எறியர் ஓக்கிய சிறு செங்குவளை | எறிவதற்காக ஓங்கிய சிறிய செங்குவளை மலரை, |
| ஈ என இரப்பவும் ஒல்லாள் நீ எமக்கு | எனக்குத் தா என்று இரு கை நீட்டி வேண்டவும், சினம் குறையாதவளாய், “நீ எமக்கு |
| யாரையோ என பெயர்வோள் கையதை | இனி யாரோ?” என்று அந்த இடத்தை விட்டு நீங்கிச் செல்பவளின் கையினில் இருந்த குவளை மலரைச் |
| கதுமென உருத்த நோக்கமோடு அது நீ | சட்டென்று வெகுண்ட பார்வையுடன் அதனை நீ |
| பாஅல் வல்லாய் ஆயினை பாஅல் | பறித்துக்கொள்ளுவதற்கு இயலாதவனாய் ஆகிவிட்டாய்; ஆனால் இதனைப் பறித்துக்கொள்ள |
| யாங்கு வல்லுநையோ வாழ்க நின் கண்ணி | எவ்வாறு உன்னால் முடிந்தது? வாழ்க! உன் தலைமாலை! |
| அகல் இரு விசும்பில் பகல் இடம் தரீஇயர் | அகன்ற கரிய வானத்தில் பகல்காலத்துக்கு இடம் தருவதற்காக, |
| தெறு கதிர் திகழ்தரும் உரு கெழு ஞாயிற்று | சுடுகின்ற கதிர்கள் ஒளிர்கின்ற நிறம் பொருந்திய ஞாயிற்றின் |
| உருபு கிளர் வண்ணம் கொண்ட | உருவத்தையும், எழுச்சியுற்ற இயல்பினையும் கொண்ட, |
| வான் தோய் வெண்குடை வேந்தர்_தம் எயிலே | வெண்கொற்றக்குடையையுடைய வேந்தரின் வானளாவ நிற்கும் கோட்டைகளை – |
| # 53 பாட்டு 53 | # 53 பாட்டு 53 |
| வென்று கலம் தரீஇயர் வேண்டு புலத்து இறுத்து அவர் | பகைவரை வென்று, அவரின் செல்வத்தைக் கொணர்வதற்காக, அவர் நாட்டில் நினைத்த இடத்தில் தங்கி, அவர் தம் |
| வாடா யாணர் நாடு திறை கொடுப்ப | குன்றாத புதுவருவாயையுடைய நாட்டையே திறையாகக் கொடுத்து, |
| நல்கினை ஆகு-மதி எம் என்று அருளி | ‘அருள்செய்பவனாய் இருப்பாய் எம்மிடம்” என்று வேண்டி நிற்க, அவருக்கு அருள்செய்து, |
| கல் பிறங்கு வைப்பின் கடறு அரை யாத்த நின் | மலைகள் சுடரிட்டு விளங்கும் நாட்டினில், இடுப்பில் கட்டியது போல் காடு சூழ்ந்துள்ள உன் |
| தொல் புகழ் மூதூர் செல்குவை ஆயின் | பழமையான புகழையுடைய முதிய ஊருக்குச் செல்வாயென்றால், |
| செம் பொறி சிலம்பொடு அணி தழை தூங்கும் | செம்மையாகச் சேர்த்து மூட்டப்பட்ட கால்சிலம்போடு, ஆடையாகத் தொடுக்கப்பட்ட தழையுடையும் தொங்குகின்ற, |
| எந்திர தகைப்பின் அம்பு உடை வாயில் | வில் இல்லாமல் எந்திரக் கட்டுமானத்தில் நிறுத்திவைக்கப்பட்டுள்ள அம்புகளை உடைய வாயில் – |
| கோள் வல் முதலைய குண்டு கண் அகழி | பிடிப்பதில் வல்ல முதலைகளைக் கொண்ட ஆழமான இடத்தையுடை அகழி – |
| வான் உற ஓங்கிய வளைந்து செய் புரிசை | வானைத் தொடும்படி உயர்ந்துநிற்கும் வளைவு வளைவாக அமைக்கப்பட்ட மதில் – ஆகியவற்றைக் கொண்டு, |
| ஒன்னா தெவ்வர் முனை கெட விலங்கி | ஒத்துவராத பகைவர் மேற்கொள்ளும் போரினை அழிக்கும்படியாகக் குறுக்கிட்டு நிற்கின்ற, |
| நின்னின் தந்த மன் எயில் அல்லது | உன்னால் சிறிய வேந்தருக்குக் கொடுக்கப்பட்ட, இப்போது உனக்கு அடங்காமற்போன, கோட்டைகளை அல்லாமல், |
| முன்னும் பின்னும் நின் முன்னோர் ஓம்பிய | உன் முன்னோர்களுக்கு முன்னிருந்தோராலும், அவருக்குப் பின்வந்தோராலும் பேணிப் பாதுகாக்கப்பட்ட |
| எயில் முகப்படுத்தல் யாவது வளையினும் | கோட்டையின் எதிரில் நிற்பது எதற்காக? இதனைக் கைப்பற்றி, இதன் வழியே செல்லாமல் வளைந்து, |
| பிறிது ஆறு செல்-மதி சினம் கெழு குருசில் | வேறு சுற்றுவழியில் செல்வாயாக! சினம் பொருந்திய வேந்தனே! |
| எழூஉ புறந்தரீஇ பொன் பிணி பலகை | கணைய மரத்தால் காக்கப்பட்டு, இரும்பு ஆணிகள் தைத்த பலகைகளால் ஆன |
| குழூஉ நிலை புதவின் கதவு மெய் காணின் | பற்பல நிலைகளையுடைய சிறிய நுழைவாயில்களையுடைய கதவுகளின் உருவத்தைக் கண்டாலே, |
| தேம் பாய் கடாத்தொடு காழ் கைநீவி | தேனீக்கள் மொய்க்கும் மதநீரோடு, பாகரின் குத்துக்கோலுக்கும் கைமீறிக்கொண்டு, |
| வேங்கை வென்ற பொறி கிளர் புகர் நுதல் | வேங்கை மரத்தைப் புலி என்று நினைத்து அழித்த வடுக்கள் அமைந்த புள்ளிகளையுடைய நெற்றியையுடையவாய், |
| ஏந்து கை சுருட்டி தோட்டி நீவி | ஏந்திய கையைச் சுருட்டிக்கொண்டு, மேலிருப்போர் வழிநடத்தும் அங்குசத்தையும் மீறிக்கொண்டு, |
| மேம்படு வெல் கொடி நுடங்க | உயர்ந்து நிற்கும் வெற்றிக்கொடிஅசைந்தாட, |
| தாங்கல் ஆகா ஆங்கு நின் களிறே | அடக்கமாட்டாமற் செல்லும் அங்கு உன் களிறு. |
| # 54 பாட்டு 54 | # 54 பாட்டு 54 |
| வள்ளியை என்றலின் காண்கு வந்திசினே | ஈகை நெஞ்சுடையவன் என்று சொல்லப்படுவதால் உன்னைக் காண்பதற்காக வந்திருக்கிறேன், |
| உள்ளியது முடித்தி வாழ்க நின் கண்ணி | நான் நினைப்பதை முடித்துத்தருவாய்! வாழ்க! உன் தலைமாலை! |
| வீங்கு இறை தடைஇய அமை மருள் பணை தோள் | புடைத்தெழுந்து இறங்கும், பெருத்த, மூங்கில் போன்ற பருத்த தோள்களையும், |
| ஏந்து எழில் மழை கண் வனைந்து வரல் இள முலை | ஏந்திய அழகினைக் கொண்ட குளிர்ந்த கண்களையும், பருத்துப் புடைத்து வரும் இளம் முலைகளையும், |
| பூ துகில் அல்குல் தேம் பாய் கூந்தல் | பூப்போட்ட துகில் மூடிய அல்குலையும், தேனொழுகும் கூந்தலையும், |
| மின் இழை விறலியர் நின் மறம் பாட | மின்னுகின்ற அணிகலன்களையும் கொண்ட விறலியர் உன் வீரத்தைப் புகழ்ந்து பாட |
| இரவலர் புன்கண் தீர நாள்-தொறும் | இரந்து வருவோரின் இன்னல்கள் தீரும்படியாக, நாள்தோறும் |
| உரை சால் நன் கலம் வரைவு இல வீசி | புகழ்ந்துரைக்கும்படியான பெருஞ் செல்வத்தை வரையாது வழங்கி, |
| அனையை ஆகல் மாறே எனையதூஉம் | அப்படிப்பட்டவனாய் நீ இருப்பதனால் – சிறிதளவு காலத்திற்குக்கூட, |
| உயர்_நிலை_உலகத்து செல்லாது இவண் நின்று | உயர்நிலை உலகமாம் விண்ணுலகிற்குச் செல்லாமல், இங்கேயே இருந்து |
| இரு நிலம் மருங்கின் நெடிது மன்னியரோ | பெரிய நிலவுலகத்தில் நெடுங்காலம் வாழ்வாயாக! |
| நிலம் தப இடூஉம் ஏணி புலம் படர்ந்து | எதிர்ப்பாரின் நிலப்பகுதி குறைவுபடும்படி அமைக்கப்பட்ட, அவரின் எல்லைக்குட்பட்ட நிலத்துப் பாசறையில் தங்கி, |
| படு கண் முரசம் நடுவண் சிலைப்ப | ஒலிக்கின்ற முகப்பையுடைய முரசம் பாசறையின் நடுவில் முழங்க, |
| தோமர வலத்தர் நாமம் செய்ம்-மார் | வலக்கையில் தண்டினை ஏந்தியவராய், போரினைச் செய்வதற்காக, |
| ஏவல் வியம் கொண்டு இளையரொடு எழுதரும் | முரசின் ஏவலை மேற்கொண்டு இளைய வீரருடன் நிற்கின்ற, |
| ஒல்லார் யானை காணின் | உன்னுடன் உடன்படாதோரின் யானைப் படையைக் கண்டால், |
| நில்லா தானை இறை கிழவோயே | நில்லாமல் சென்று தாக்கும் சேனைகளையுடைய அரசுரிமை உடையவனே! |
| # 55 பாட்டு 55 | # 55 பாட்டு 55 |
| ஆன்றோள் கணவ சான்றோர் புரவல | கற்பிற் சிறந்தவளின் கணவனே! நற்குணம் நிரம்பியவரை ஆதரிப்பவனே! |
| நின் நயந்து வந்தனென் அடு போர் கொற்றவ | உன்னை விரும்பிக் காண வந்தேன், கொல்லுகின்ற போரைச் செய்யும் கொற்றவனே! |
| இன் இசை புணரி இரங்கும் பௌவத்து | இனிய ஓசையுள்ள அலைகள் முழங்கும் கடல் வழியே வந்த |
| நன் கல வெறுக்கை துஞ்சும் பந்தர் | நிறைந்த அணிகலன்களாகிய செல்வம் தேங்கியிருக்கும் பண்டகசாலைகள் உள்ள |
| கமழும் தாழை கானல் அம் பெரும் துறை | கமழ்கின்ற தாழைகள் பூத்திருக்கும் கடற்கரைச் சோலை இருக்கும் அழகிய பெரிய துறையையுடைய |
| தண் கடல் படப்பை நன் நாட்டு பொருந | குளிர்ந்த கடற்கரைப் பகுதியாகிய நல்ல நாட்டுக்குத் தலைவனே! |
| செ ஊன் தோன்றா வெண் துவை முதிரை | தன்னில் கலந்த சிவந்த இறைச்சி வெளியில் தெரியாதவாறு அரைத்த வெண்மையான துவரைச் துவையலையும், |
| வால் ஊன் வல்சி மழவர் மெய்ம்மறை | வெண்மையான நிணம் கலந்த ஊன்சோற்றினையும் உணவாகக் கொண்ட மழவர்களின் கவசம் போன்றவனே! |
| குடவர் கோவே கொடி தேர் அண்ணல் | குடநாட்டாரின் கோமகனே! கொடிகள் பறக்கும் தேரையுடைய அண்ணலே! |
| வாரார் ஆயினும் இரவலர் வேண்டி | இரந்து வருபவர் வராமற்போனாலும், இரவலர் வருவதை விரும்பி |
| தேரின் தந்து அவர்க்கு ஆர் பதம் நல்கும் | வெளியூரிலிருந்து தேரில் வரவழைத்து, அவர்களுக்கு நிறைய உணவை வழங்கும், |
| நசை சால் வாய்மொழி இசை சால் தோன்றல் | கேட்பதற்கு விருப்பமுள்ள உண்மையான மொழியினையுடைய புகழ் நிறைந்த தோன்றலே! |
| வேண்டுவ அளவையுள் யாண்டு பல கழிய | – நீ வேண்டும் கால அளவுக்கு, ஆண்டுகள் பல கழிய, |
| பெய்து புறந்தந்து பொங்கல் ஆடி | மழையைப் பெய்து உலகைக் காத்த பின்பு, பஞ்சுப் பிசிறுகளாய்ப் பொங்கி மேலெழுந்து, |
| விண்டு சேர்ந்த வெண் மழை போல | மலை உச்சியை அடையும் வெண் மேகத்தைப் போல, |
| சென்றாலியரோ பெரும அல்கலும் | சென்று கெடாமல் இருப்பதாக, பெருமானே! நாள்தோறும் |
| நனம் தலை வேந்தர் தார் அழிந்து அலற | அகன்ற இடத்தையுடைய வேந்தரின் முன்னணிப்படையினர் அழிந்து அலறும்படியாக, |
| நீடு வரை அடுக்கத்த நாடு கைக்கொண்டு | நீண்ட மலையில் பல மலையிடுக்குகளைக் கொண்ட நாடுகளைக் கைப்பற்றிப் |
| பொருது சினம் தணிந்த செரு புகல் ஆண்மை | போரிட்டு, அவர் மேலெழுந்த சினம் தணிந்துபோன போரை விரும்பும் ஆண்மையினையும், |
| தாங்குநர் தகைத்த ஒள் வாள் | எதிர்நின்று தடுக்கும் பகைவரை முற்றிலும் அழிக்கும் ஒளிரும் வாளினையும், |
| ஓங்கல் உள்ளத்து குருசில் நின் நாளே | எழுச்சிமிக்க உள்ளத்தினையும் கொண்ட வேந்தனே! உனது வாழ்நாள் – |
| # 56 பாட்டு 56 | # 56 பாட்டு 56 |
| விழவு வீற்றிருந்த வியலுள் ஆங்கண் | விழா நடைபெறுகின்ற அகன்ற உள்ளிடத்தைக் கொண்ட ஊரில் |
| கோடியர் முழவின் முன்னர் ஆடல் | கூத்தரின் முழவுக்கு முன்னால் ஆடுவதில் |
| வல்லான் அல்லன் வாழ்க அவன் கண்ணி | வல்லவன் அல்லன்; வாழ்க! அவன் தலைமாலை! |
| வலம் படு முரசம் துவைப்ப வாள் உயர்த்து | வெற்றியையுடைய முரசத்தை ஓங்கி அறைய, வாளினை உயர்த்திக்கொண்டு |
| இலங்கும் பூணன் பொலம் கொடி உழிஞையன் | மின்னிடும் பூணினை அணிந்தவனாயும், பொன்னாலான கொடியாகிய உழிஞையைச் சூடியவனாயும், |
| மடம் பெருமையின் உடன்று மேல் வந்த | அறியாமை மிகுதியால் பகைகொண்டு மேலேறி வந்த |
| வேந்து மெய்ம்மறந்த வாழ்ச்சி | வேந்தர்கள் தம் உடம்பை விட்டு மேலுலகத்துக்குச் சென்று வாழும்படி |
| வீந்து உகு போர்_களத்து ஆடும் கோவே | இறந்து விழும் போர்க்களத்தில் ஆடுகின்ற அரசன் – |
| # 57 பாட்டு 57 | # 57 பாட்டு 57 |
| ஓடா பூட்கை மறவர் மிடல் தப | தோற்று ஓடக்கூடாது என்ற உறுதிப்பாட்டையுடைய வீரரின் வலிமை கெடும்படியாக, |
| இரும் பனம் புடையலொடு வான் கழல் சிவப்ப | பெரிய பனந்தோட்டால் செய்த மாலையோடு, வெண்மையான வீரக் கழலும் சிவந்துபோகுமாறு |
| குருதி பனிற்றும் புலவு களத்தோனே | இரத்தம் சிதறித்தெளிக்கும் புலால் நாறும் போர்க்களத்தில் இருக்கிறான், |
| துணங்கை ஆடிய வலம் படு கோமான் | துணங்கைக் கூத்து ஆடிய வெற்றி பொருந்திய சேரமான்; |
| மெல்லிய வகுந்தில் சீறடி ஒதுங்கி | மென்மையான நிலத்து வழியினில், தன் சிறிய கால்களால் ஒதுங்கி நடந்து |
| செல்லாமோ தில் சில் வளை விறலி | செல்வோமா, ஒருசில வளையல்களை அணிந்த விறலியே? – |
| பாணர் கையது பணி தொடை நரம்பின் | பாணர் கையிலுள்ள கீழே இழுத்துக்கட்டிய நரம்பினையுடைய |
| விரல் கவர் பேரியாழ் பாலை பண்ணி | விரலால் வாசிக்கப்படும் பேரியாழில், பாலைப் பண்ணை அமைத்து, |
| குரல் புணர் இன் இசை தழிஞ்சி பாடி | குரல் என்ற நரம்போடு சேர்த்த இனிய இசையில் தழிஞ்சி என்னும் துறையைப் பாடி, |
| இளம் துணை புதல்வர் நல் வளம் பயந்த | இளமையான துணையாகிய புதல்வராகிய நல்ல செல்வத்தைப் பெற்றளித்த |
| வளம் கெழு குடைச்சூல் அடங்கிய கொள்கை | வளமை பொருந்திய சிலம்பையும், அடக்கத்தால் உயர்ந்த ஒழுக்கத்தையும், |
| ஆன்ற அறிவின் தோன்றிய நல் இசை | நிறைந்த அறிவையும், நற்குணங்களால் உண்டாகிய நல்ல புகழையும் உடைய, |
| ஒண் நுதல் மகளிர் துனித்த கண்ணினும் | ஒளிவிடும் நெற்றியைக் கொண்ட மகளிர் புலவியால் கோபங்கொண்டு பார்க்கும் பார்வையைக் காட்டிலும், |
| இரவலர் புன்கண் அஞ்சும் | இரந்து வருவோரின் இன்னலுள்ள பார்வைக்கு அஞ்சுகின்ற, |
| புரவு எதிர்கொள்வனை கண்டனம் வரற்கே | நம்மைப் பாதுகாத்தலை மேற்கொண்டுள்ளவனைப் பார்த்து வருவதற்கு – |
| # 58 பாட்டு 58 | # 58 பாட்டு 58 |
| ஆடுக விறலியர் பாடுக பரிசிலர் | ஆடுவீர்களாக விறலியர்களே! பாடுவீர்களாக பரிசில் மாக்களே! |
| வெண் தோட்டு அசைத்த ஒண் பூ குவளையர் | வெண்மையான பனந்தோட்டில் கட்டிய ஒளிவிடும் குவளைப்பூவையுடையவராய், |
| வாள் முகம் பொறித்த மாண் வரி யாக்கையர் | வாளின் கூரிய பக்கம் ஏற்படுத்திய சிறப்புப் பொருந்திய தழும்பினைக் கொண்ட உடம்பினராய், |
| செல் உறழ் மறவர் தம் கொல் படை தரீஇயர் | இடியைப் போன்ற மறவர்கள் தம்முடைய கொல்லுகின்ற ஆயுதங்களைக் கொண்டுவர, |
| இன்று இனிது நுகர்ந்தனம் ஆயின் நாளை | இன்று இனிதே நுகர்ந்தோம் என்றாலும், நாளை |
| மண் புனை இஞ்சி மதில் கடந்து அல்லது | மண்ணால் கட்டப்பட்ட கோட்டைமதில்களைக் கடந்தபின் அன்றி |
| உண்குவம் அல்லேம் புகா என கூறி | உண்ண மாட்டோம் உணவினை என்று கூறி |
| கண்ணி கண்ணிய வயவர் பெருமகன் | போருக்கான தலைமாலையை சூடக் கருதிய வீரர்களின் பெருமகன், |
| பொய் படுபு அறியா வயங்கு செம் நாவின் | தம்முடைய கூற்று பொய்யாவதனை அறியாத தெளிவானதும் செம்மையானதுமான நாவினையும், |
| எயில் எறி வல் வில் ஏ விளங்கு தட கை | பகைவரின் மதில்களை அழிக்கும் வலிய வில்லும், அம்பும் விளங்குகின்ற பெரிய கையினையும், |
| ஏந்து எழில் ஆகத்து சான்றோர் மெய்ம்மறை | உயர்ந்த அழகிய மார்பினையும் கொண்ட, சான்றோரின் கவசம் போன்ற, |
| வானவரம்பன் என்ப கானத்து | வானவரம்பனாகிய சேரமன்னன் என்று கூறுவர்; காட்டினில் |
| கறங்கு இசை சிதடி பொரி அரை பொருந்திய | ஒலிக்கின்ற ஓசையையுடைய சிள்வண்டுகள் பொரிப்பொரியான அடிப்பகுதியில் தங்கியிருக்கும் |
| சிறியிலை வேலம் பெரிய தோன்றும் | சிறிய இலைகளைக் கொண்ட வேல மரங்கள் மிகுதியாய் இருக்கும் |
| புன்_புலம் வித்தும் வன் கை வினைஞர் | புன்செய் நிலங்களை உழுது விதைக்கும் வலிமையான கைகளையுடைய உழவர்கள் |
| சீர் உடை பல் பகடு ஒலிப்ப பூட்டி | சிறப்பினை உடைய பல காளைகள் ஒலியெழுப்ப அவற்றைக் கலப்பையில் பூட்டி உழுது |
| நாஞ்சில் ஆடிய கொழு வழி மருங்கின் | கலப்பையின் கொழுச் சென்ற சாலின் பக்கத்தில் |
| அலங்கு கதிர் திரு மணி பெறூஉம் | அசைகின்ற கதிர்களில் அழகிய தானிய மணிகளைப் பெறுகின்ற |
| அகன் கண் வைப்பின் நாடு கிழவோனே | அகன்ற இடங்களைக் கொண்ட ஊர்களையுடைய நாட்டுக்குரியவன். |
| # 59 பாட்டு 59 | # 59 பாட்டு 59 |
| பகல் நீடு ஆகாது இரவு பொழுது பெருகி | பகற்பொழுது நீண்டு அமையாமல், இரவுப்பொழுது நீண்டு உள்ள |
| மாசி நின்ற மா கூர் திங்கள் | மாசி மாதத்து, விலங்குகளும் குளிர் மிகுந்து வருந்தும் காலத்தில் |
| பனி சுரம் படரும் பாண்_மகன் உவப்ப | மிகுந்த குளிர் உள்ள பாலைவழியில் செல்லும் பாணன் மகிழும்படியாக, |
| புல் இருள் விடிய புலம்பு சேண் அகல | புன்மையான இருள் முடிந்து விடிய, தனிமைத்துயர் நெடுந்தொலைவுக்கு விட்டகல, |
| பாய் இருள் நீங்க பல் கதிர் பரப்பி | பரவிக்கிடக்கும் இருள் அகன்றுபோகும்படி, தனது பலவான கதிர்களைப் பரப்பி |
| ஞாயிறு குண முதல் தோன்றி ஆங்கு | ஞாயிறு கீழ் வானத்தில் தோன்றியதைப் போல, |
| இரவல் மாக்கள் சிறுகுடி பெருக | இரந்துண்ணும் மக்கள் வாழும் ஊர்களில் வளம் சிறக்கும்படியாக |
| உலகம் தாங்கிய மேம்படு கற்பின் | உலகத்து உயிர்களைத் தாங்குகின்ற, மேம்பட்ட கல்வியறிவையுடைய |
| வில்லோர் மெய்ம்மறை வீற்று இரும் கொற்றத்து | வில்வீரர்களுக்குக் கவசம் போன்றவனே! வீறுபெற்று இருக்கும் பெரும் அரசாண்மையுடைய |
| செல்வர் செல்வ சேர்ந்தோர்க்கு அரணம் | வேந்தர்க்கெல்லாம் வேந்தனே! உன்னைச் சேர்ந்திருப்போருக்கு அரணம் போன்றவனே! |
| அறியாது எதிர்ந்து துப்பில் குறை_உற்று | அறியாமல் உன்னை எதிர்த்துப் போரிட்டு, தம் வலிமையில் குறைவுற்று, |
| பணிந்து திறை தருப நின் பகைவர் ஆயின் | உன்னைப் பணிந்துகொண்டு உனக்குத் திறை கொடுப்பர் உன் பகைவர் என்றால் |
| சினம் செல தணியுமோ வாழ்க நின் கண்ணி | உன் சினம் உன்னிடத்திலிருந்து சென்றுவிடத் தணியுமோ? வாழ்க உன் தலைமாலை! |
| பல் வேறு வகைய நனம் தலை ஈண்டிய | பல்வேறு வகைப்பட்ட அகன்ற நாடுகளிலிருந்து வந்து குவிந்த, |
| மலையவும் கடலவும் பண்ணியம் பகுக்கும் | மலையில் கிடைப்பனவும், கடலில் கிடைப்பனவும் ஆகிய பொருள்களைப் பகிர்ந்தளிக்கும் |
| ஆறு முட்டு_உறாஅது அறம் புரிந்து ஒழுகும் | வழிகளால், குன்றாமல் அறத்தைச் செய்து ஒழுகும் |
| நாடல் சான்ற துப்பின் பணை தோள் | பகைவர் நாடுதற்குரிய வலிமை பொருந்திய பருத்த தோள்களால், |
| பாடு சால் நன் கலம் தரூஉம் | பாடற்குரிய உயர்ந்த செல்வங்களை அளிக்கும் |
| நாடு புறந்தருதல் நினக்கு-மார் கடனே | நாடுகளைப் பாதுகாத்தல் உனக்குக் கடமையாகும். |
| # 60 பாட்டு 60 | # 60 பாட்டு 60 |
| கொலை வினை மேவற்று தானை தானே | கொலைத்தொழிலை விரும்பியது சேனை; தானும் |
| இகல் வினை மேவலன் தண்டாது வீசும் | போர்த்தொழிலையே விரும்புவான்; குறைவின்றி வாரி வழங்குவான்; |
| செல்லாமோ தில் பாண்_மகள் காணியர் | போவோமா? பாண்மகளே! அவனைக் காண்பதற்கு – |
| மிஞிறு புறம் மூசவும் தீம் சுவை திரியாது | வண்டுகள் புறத்தே மொய்த்துநிற்கவும், இனிய சுவையில் மாறுபடாது, |
| அரம் போழ்கல்லா மரம் படு தீம் கனி | அரம்பத்தால் அறுக்கமுடியாத மரத்தில் உண்டாகிய சுவையான கனியாகிய |
| அம் சேறு அமைந்த முண்டை விளை பழம் | அழகிய குழைவான சதைப்பற்று அமைந்த முட்டை போன்ற முதிர்ந்த பழங்கள் |
| ஆறு செல் மாக்கட்கு ஓய் தகை தடுக்கும் | வழியில் செல்லும் மக்களுக்கு தளர்வான நிலையைத் தடுத்து நிறுத்தும், |
| மறாஅ விளையுள் அறாஅ யாணர் | மாறாத விளைச்சலுள்ள அற்றுப்போகாத புதுவருவாயையுடைய, |
| தொடை மடி களைந்த சிலை உடை மறவர் | அம்பினைத் தொடுப்பதில் சோம்பலைக் களைந்த வில்லையுடைய மறவர்கள் |
| பொங்கு பிசிர் புணரி மங்குலொடு மயங்கி | பொங்குகின்ற சிறு திவலைகளைச் சிதறும் அலைகளோடு, தாழ்ந்து வரும் மேகங்கள் கலந்து |
| வரும் கடல் ஊதையின் பனிக்கும் | வரும் கடலின் குளிர்ந்த காற்றில் மிகவும் நடுக்கம்கொள்ளும், |
| துவ்வா நறவின் சாய் இனத்தானே | நுகரமுடியாத நறவாகிய நறவு என்னும் ஊரில் உள்ள மென்மையான மகளிர் நடுவே – |
| ஏழாம் பத்து | ஏழாம் பத்து |
| கபிலர் | கபிலர் |
| # 61 பாட்டு 61 | # 61 பாட்டு 61 |
| பலா அம் பழுத்த பசும் புண் அரியல் | பலா மரத்தில் பழுத்து வெடித்த புதிய வெடிப்பிலிருந்து ஒழுகும் கள்போன்ற சாற்றின் மணத்தை |
| வாடை தூக்கும் நாடு கெழு பெரு விறல் | வாடைக்காற்று அந்த வெளியெல்லாம் பரப்பும் நாட்டினைப் பொருந்திய பெரிய திறம் படைத்தவனும், |
| ஓவத்து அன்ன வினை புனை நல் இல் | ஓவியத்தில் வரைந்தது போன்ற வேலைப்பாட்டுடன் கட்டப்பட்ட நல்ல இல்லத்தில் இருக்கும், |
| பாவை அன்ன நல்லோள் கணவன் | பாவையைப் போன்ற நல்ல அழகும் நலமும் அமைந்தவளின் கணவனும், |
| பொன்னின் அன்ன பூவின் சிறியிலை | பொன்னைப் போன்ற பூவைக் கொண்ட சிறிய இலைகளையுடைய |
| புன் கால் உன்னத்து பகைவன் எம் கோ | புன்மையான அடிமரத்தையுடைய உன்ன மரத்துக்குப் பகைவனும், எமக்கு அரசனும், |
| புலர்ந்த சாத்தின் புலரா ஈகை | பூசப்பட்டுப் புலர்ந்துபோன சந்தனத்தையும், அப்படிப் புலர்ந்து போகாத ஈகைத்திறத்தையும் |
| மலர்ந்த மார்பின் மா வண் பாரி | கொண்ட அகன்ற மார்பினையுடைய பெரிய வள்ளல்தன்மையுடைய பாரி |
| முழவு மண் புலர இரவலர் இனைய | முழவின் கண்ணில் பூசப்பட்ட கரிய சாந்து புலர்ந்துபோகவும், கொடுப்போர் இல்லாததால் இரவலர்கள் வருந்தவும், |
| வாரா சேண் புலம் படர்ந்தோன் அளிக்க என | திரும்பி வரமுடியாத தொலைதூரத்து மேலுலகுக்குச் சென்றுவிட்டான்; அருள்செய்வாயாக என்று |
| இரக்கு வாரேன் எஞ்சி கூறேன் | உன்னிடன் இரந்து வரவில்லை; உன்னை மிகைபடக் கூறமாட்டேன்; |
| ஈத்தது இரங்கான் ஈத்-தொறும் மகிழான் | கொடுப்பதினால் மனம் குன்றிப்போவதில்லை; கொடுத்துக்கொண்டே இருப்பதினால் மகிழ்ந்துபோவதுமில்லை; |
| ஈத்-தொறும் மா வள்ளியன் என நுவலும் நின் | கொடுக்கக் கொடுக்க இன்னும் பெரிதும் கொடுப்பவன் என்று உலகத்தவர் கூறும் உன்னுடைய |
| நல் இசை தர வந்திசினே ஒள் வாள் | நல்ல புகழ் என்னை ஈர்க்க உன்னிடம் வந்துள்ளேன்; ஒளிரும் வாட்படையும், |
| உரவு களிற்று புலா அம் பாசறை | வலிமை மிக்க யானைகளும் உள்ள புலால் நாற்றமுள்ள பாசறையில், |
| நிலவின் அன்ன வெள் வேல் பாடினி | நிலாவின் ஒளியைப் போன்ற வெண்மையான உன் வேலினைப் பாடும் பாடினி, |
| முழவில் போக்கிய வெண்கை | முழவின் ஓசைக்கேற்ப வெறுங்கையை அசைத்து ஆடும், |
| விழவின் அன்ன நின் கலி மகிழானே | திருவிழாவைப் போன்ற உன்னுடைய ஆரவாரமிக்க அரசிருப்பில் – |
| # 62 பாட்டு 62 | # 62 பாட்டு 62 |
| இழை அணிந்து எழுதரும் பல் களிற்று தொழுதியொடு | நெற்றிப்பட்டமும், மாலைகளுமாகிய அணிகலன்கள் அணிந்து நிற்கும் பல யானைகளின் தொகுதியும், |
| மழை என மருளும் மா இரும் பல் தோல் | மேகங்களோ என்று மருண்டு நோக்கக்கூடிய கரிய பெரிய பல தோல் கேடகங்களும், |
| எஃகு படை அறுத்த கொய் சுவல் புரவியொடு | வேற்படையை அழித்த கொய்யப்பட்ட பிடரி மயிரையுடைய குதிரைப் படையும் ஆகிய உன் சேனை |
| மைந்து உடை ஆர் எயில் புடை பட வளைஇ | வலிமை உடைய கடப்பதற்கரிய கோட்டை மதிலைப் பக்கவாட்டில் வளைத்து |
| வந்து புறத்து இறுக்கும் பசும் பிசிர் ஒள் அழல் | வந்து கோட்டைக்கு வெளியே தங்கியிருக்கின்றது; பகைப்புலத்தைச் சுட்டெரித்த பசிய பிசிர்களுடன் ஒளிவிடும் நெருப்பானது |
| ஞாயிறு பல்கிய மாயமொடு சுடர் திகழ்பு | பல ஞாயிறுகளைப் போன்ற மாயத்தோற்றத்துடன் சுடர்விட்டுத் திகழ, |
| ஒல்லா மயலொடு பாடு இமிழ்பு உழிதரும் | உயிர்களுக்குப் பொறுக்கமுடியாத கலக்கத்தைத் தந்து, பெரும் முழக்கத்தோடு திரியும் |
| மடங்கல் வண்ணம் கொண்ட கடும் திறல் | கூற்றுவனின் இயல்பினைக் கொண்டகடுமையான வலிமைமிக்க, |
| துப்பு துறைபோகிய கொற்ற வேந்தே | போர்த்துறையில் சிறப்பெய்திய வெற்றியையுடைய வேந்தனே! |
| புனல் பொரு கிடங்கின் வரை போல் இஞ்சி | வெள்ளமாய் நீர் மோதும் அகழியையும், மலை போன்ற மதிலினையும் கொண்டு, |
| அணங்கு உடை தட கையர் தோட்டி செப்பி | தெய்வமாய் நின்றுவருத்தும் பெரிய கையினையுடையவராய் உனது அதிகாரமிக்க ஆளுமையைக் கூறியவாறு |
| பணிந்து திறை தருப நின் பகைவர் ஆயின் | பணிந்து திறை தருவர் உன் பகைவர் என்றால், |
| புல் உடை வியன் புலம் பல் ஆ பரப்பி | புற்களையுடைய அகன்ற வெளியில் பலவான பசுக்களை மேயவிட்டு, |
| வளன் உடை செறுவின் விளைந்தவை உதிர்ந்த | வளப்பத்தையுடைய வயல்களில் விளைந்தவற்றைக் கதிர்களிலிருந்து உதிர்க்கும் |
| களன் அறு குப்பை காஞ்சி சேர்த்தி | களத்தில் தூற்றப்படுவதில்லாத நெல்மணிக் குவியலைக் காஞ்சி மரத்தடியில் கூட்டிச் சேர்த்து, |
| அரியல் ஆர்கை வன் கை வினைஞர் | கள்ளை நிறைய உண்ணும் வலிமையான கைகளைக் கொண்ட உழவர்கள் |
| அருவி ஆம்பல் மலைந்த சென்னியர் | அருவிநீரில் செழித்து வளர்ந்த ஆம்பல் பூவை உச்சந்தலையில் சூடியவராய் |
| ஆடு சிறை வரி வண்டு ஓப்பும் | அசைகின்ற சிறகுகளையுடைய வரிகளைக் கொண்ட வண்டுகளை விரட்டும்,அ |
| பாடல் சான்ற அவர் அகன் தலை நாடே | புலவர் பாடும் சிறப்பைப் பெறுவனவாகும் அந்தப் பகைவரின் அகன்ற இடங்களைக் கொண்ட நாடுகள். |
| # 63 பாட்டு 63 | # 63 பாட்டு 63 |
| பார்ப்பார்க்கு அல்லது பணிபு அறியலையே | பார்ப்பனரைத் தவிர பிறரைப் பணிதலை அறியாய்; |
| பணியா உள்ளமொடு அணி வர கெழீஇ | இவ்வாறு பணியாத உள்ளத்தோடு அழகுவரப் பொருந்தி, |
| நட்டோர்க்கு அல்லது கண் அஞ்சலையே | உன்னுடன் நட்புக்கொண்டோரைத் தவிர பிறருக்குப் பரிவுகொண்டு அஞ்சமாட்டாய்; |
| வணங்கு சிலை பொருத நின் மணம் கமழ் அகலம் | வளைந்த வானவில்லோடு போட்டிபோடும் பூமாலையின் மணம் கமழ்கின்ற உன் மார்பானது |
| மகளிர்க்கு அல்லது மலர்ப்பு அறியலையே | மகளிரைத் தவிர வேறு யாருக்கும் திறந்து காட்டுவதனை அறியாது; |
| நிலம் திறம் பெயரும் காலை ஆயினும் | நிலங்கள் தம் இயல்பினின்றும் மாறுபடும் காலம் என்றாலும் |
| கிளந்த சொல் நீ பொய்ப்பு அறியலையே | சொன்ன சொல்லை நீ பொய்த்தலை அறியமாட்டாய்; |
| சிறியிலை உழிஞை தெரியல் சூடி | சிறிய இலைகளையுடைய உழிஞைப்பூ மாலையைச் சூடிக்கொண்டு |
| கொண்டி மிகைபட தண் தமிழ் செறித்து | பகைவர் நாட்டுக் கொள்ளைப்பொருள் மிகுந்திருக்க, அருளுள்ளம் கொண்ட தமிழ்வீரர்களை நிறையக் கொண்டு |
| குன்று நிலை தளர்க்கும் உருமின் சீறி | குன்றின் நிலையையே தளரச்செய்யும் இடியைப் போலச் சீற்றங்கொண்டு, |
| ஒரு முற்று இருவர் ஓட்டிய ஒள் வாள் | ஒரு முற்றுகையில் இரு பெரும் வேந்தர்களை ஓட்டிய ஒளிரும் வாளையுடைய, |
| செரு மிகு தானை வெல் போரோயே | போரில் மேம்பட்ட சேனையைக் கொண்டு வெல்லுகின்ற போரினையுடையவனே! |
| ஆடு பெற்று அழிந்த மள்ளர் மாறி | முன்னர் பல போர்களில் பகைவரைக் கொல்வதைப் பெற்று, உன்னிடம் தோற்றழிந்த வீரர்கள், பகைமை மாறி, |
| நீ கண்டனையேம் என்றனர் நீயும் | ‘உன் சொற்படி நடப்போம்’ என்று கூறினர்; நீயும் |
| நும் நுகம் கொண்டு இனும் வென்றோய் அதனால் | உன் வலிமையைக் கொண்டு மேலும் பல போர்களை வென்றாய்! அதனால் |
| செல்வக்கோவே சேரலர் மருக | செல்வக் கடுங்கோவே! சேரர் குடித்தோன்றலே! |
| கால் திரை எடுத்த முழங்கு குரல் வேலி | காற்றால் அலைகள் திரண்டெழ, முழங்குகின்ற ஓசையையுடைய கடலே வேலியாகக் கொண்ட |
| நனம் தலை உலகம் செய்த நன்று உண்டு எனின் | அகன்ற இடத்தையுடைய உலகத்து மக்கள் செய்த நன்மை நிலைபெறுவதென்றால், |
| அடை அடுப்பு அறியா அருவி ஆம்பல் | இலைகள் அடுத்தடுத்து இருப்பதில்லாத, அரிதான பூ ஆகிய ஆம்பல் என்ற எண்ணளவும், |
| ஆயிர வெள்ள ஊழி | ஆயிரம் வெள்ளம் என்ற எண்ணளவும் சேர்ந்த ஊழிகள் பல |
| வாழி ஆத வாழிய பலவே | வாழ்க! வாழியாதனே! வாழ்க! |
| # 64 பாட்டு 64 | # 64 பாட்டு 64 |
| வலம் படு முரசின் வாய் வாள் கொற்றத்து | வெற்றியுண்டாக முழங்கும் முரசினையும், குறி தப்பாமல் வாய்க்கின்ற வாளினால் பெறும் அரசாண்மையையும் |
| பொலம் பூண் வேந்தர் பலர் தில் அம்ம | பொன்னாற் செய்த பூண்களையும் உடைய வேந்தர் பலர் இருக்கின்றனர்; |
| அறம் கரைந்து வயங்கிய நாவின் பிறங்கிய | அறநூல்களை ஓதியதால் தெளிவான நாவினையுடைய, உயர்ந்த |
| உரை சால் வேள்வி முடித்த கேள்வி | புகழ் நிறைந்த வேள்விகள் செய்து முடித்த கேள்வியறிவையுடைய |
| அந்தணர் அரும் கலம் ஏற்ப நீர் பட்டு | அந்தணர்கள் அரிய கலன்களை நீர் வார்க்க ஏற்றுக்கொள்வதால், நீர் ஒழுகி ஏற்பட்ட |
| இரும் சேறு ஆடிய மணல் மலி முற்றத்து | மிகுந்த சேற்றினில் கால்பதித்த, மணல் நிறைந்த முற்றத்தில், |
| களிறு நிலை முணைஇய தார் அரும் தகைப்பின் | களிறுகள் நிற்பதற்கு வெறுத்த, ஒழுங்காக அமைந்த உயர்ந்த கட்டுக்காவலையுடைய |
| புறஞ்சிறை வயிரியர் காணின் வல்லே | அரண்மனையின் வெளிப்புறத்தில் கூத்தர்கள் வரக் காணும்போது, விரைந்து |
| எஃகு படை அறுத்த கொய் சுவல் புரவி | வேற்படையைக் கொன்று கொணரப்பட்ட, கொய்யப்பட்ட பிடரியினைக் கொண்ட குதிரைகளையும், |
| அலங்கும் பாண்டில் இழை அணிந்து ஈம் என | அசைகின்ற தேர்களையும், அவற்றுக்குரிய அணிகளை அணிந்து கொடுங்கள் என்று கூறும் |
| ஆனா கொள்கையை ஆதலின் அ வயின் | குறைவுபடாத கொள்கையை உடையவனாதலின், அவ்விடத்தில் – |
| மா இரு விசும்பில் பல் மீன் ஒளி கெட | கரிய பெரிய ஆகாயத்தில் பல விண்மீன்களின் ஒளி குன்றும்படி, |
| ஞாயிறு தோன்றி ஆங்கு மாற்றார் | ஞாயிறு உதிப்பதைப்போல், பகைவரின் |
| உறு முரண் சிதைத்த நின் நோன் தாள் வாழ்த்தி | மிகுந்த பகையைச் சிதைத்த உன் வலிய கால்களை வாழ்த்திக் |
| காண்கு வந்திசின் கழல் தொடி அண்ணல் | – காண்பதற்கு வந்திருக்கிறேன் – காலில் கழலையும், தோளில் தொடியையும் அணிந்திருக்கும் அண்ணலே! |
| மை படு மலர் கழி மலர்ந்த நெய்தல் | கரிய நிறம் உண்டாகின்ற மலர்களையுடைய கழியில் மலர்ந்த நெய்தல் பூவின் |
| இதழ் வனப்பு உற்ற தோற்றமொடு உயர்ந்த | இதழின் வனப்பைக் கொண்ட தோற்றத்தோடு, உயர்ந்த |
| மழையினும் பெரும் பயம் பொழிதி அதனால் | மழையைக் காட்டிலும் பெரிதான பயனைப் பொழிகிறாய், அதனால் |
| பசி உடை ஒக்கலை ஒரீஇய | பசித்திருக்கும் சுற்றத்தாரை அப் பசி நீங்கும்படி செய்ய |
| இசை மேம் தோன்றல் நின் பாசறையானே | புகழ் மேம்பட்ட தோன்றலே! உன் பாசறையினில் – |
| # 65 பாட்டு 65 | # 65 பாட்டு 65 |
| எறி பிணம் இடறிய செம் மறு குளம்பின் | வெட்டப்பட்டு வீழ்ந்த பிணங்களை இடறிக்கொண்டு செல்வதால் சிவந்துபோன கறை படிந்த குளம்புகளையுடைய, |
| பரி உடை நன் மா விரி உளை சூட்டி | விரைந்த ஓட்டத்தையுடைய நல்ல குதிரைகளுக்கு விரிந்த தலையாட்டத்தைச் சூட்டி, |
| மலைத்த தெவ்வர் மறம் தப கடந்த | எதிர்த்துப் போரிட்ட பகைவரின் வீரம் அழியும்படி வென்ற, |
| காஞ்சி சான்ற வயவர் பெரும | காஞ்சித்திணைக்கு அமைந்த வீரர்களுக்குத் தலைவனே! |
| வில்லோர் மெய்ம்மறை சேர்ந்தோர் செல்வ | வில்லோருக்குக் கவசமானவனே! தன்னை அடைந்தவருக்குச் செல்வமாயிருப்பவனே! |
| பூண் அணிந்து எழிலிய வனைந்துவரல் இள முலை | பூண்கள் அணியப்பெற்று அழகு பெற்ற, வடிவமைக்கப்பட்டதைப் போன்ற இளமையான முலைகளையுடைய, |
| மாண் வரி அல்குல் மலர்ந்த நோக்கின் | மாட்சிமைப்பட்ட வரிகளைக் கொண்ட அல்குலையுடைய, மலர்ச்சியான கண்களையுடைய, |
| வேய் புரைபு எழிலிய விளங்கு இறை பணை தோள் | மூங்கிலைப் போன்று அழகாய் அமைந்த, நலம்பெற்றதாய் இறங்குகின்ற பருத்த தோள்களையுடைய, |
| காமர் கடவுளும் ஆளும் கற்பின் | எல்லாரும் விரும்பும் கடவுளரையும் ஏவல்கொள்ளும் கற்பினையுடைய, |
| சேண் நாறு நறு நுதல் சே_இழை கணவ | மிக்க தொலைவுக்கும் மணக்கும் நறிய நெற்றியையுடைய, செம்மையான அணிகலன்களை அணிந்தவளின் கணவனே! |
| பாணர் புரவல பரிசிலர் வெறுக்கை | பாணர்களின் பாதுகாவலனே! பரிசிலர்களின் செல்வமாயிருப்பவனே! |
| பூண் அணிந்து விளங்கிய புகழ் சால் மார்ப நின் | பூண்கள் அணியப்பெற்று விளங்கும் புகழ் நிறைந்த மார்பினனே! உன்னுடைய |
| நாள்_மகிழ் இருக்கை இனிது கண்டிகுமே | நாளோலக்கம் என்னும் இன்பமான அரச இருக்கையை இனிதே கண்டோம் – |
| தீம் தொடை நரம்பின் பாலை வல்லோன் | இனிய முறுக்கமைந்த நரம்பினால் அமைந்த பாலை யாழை இசைப்பதில் வல்லவன் |
| பையுள் உறுப்பின் பண்ணு பெயர்த்து ஆங்கு | அழுகைச் சுவைக்குரிய உறுப்பினையுடைய பண்களை மாறிமாறி வாசிப்பதைப் போல, |
| சேறு செய் மாரியின் அளிக்கும் நின் | சேற்றை உண்டாக்கும் மழையைப் போல, அள்ளிக்கொடுக்கும் – உன்னுடைய |
| சாறு படு திருவின் நனை மகிழானே | திருவிழாக் காலத்து செல்வத்தைப் போன்ற கள்ளுண்ணும் இன்ப இருக்கையின்போது – |
| # 66 பாட்டு 66 | # 66 பாட்டு 66 |
| வாங்கு இரு மருப்பின் தீம் தொடை பழுனிய | வளைந்த கரிய கொம்புபோன்ற தண்டினையுடைய, இனிய இசைக்குரிய நரம்புகளால் நிறைந்த, |
| இடன் உடை பேரியாழ் பாலை பண்ணி | இசை இன்பத்துக்கு இடமாக உள்ள, பெரிய யாழினில் பாலைப் பண்ணை அமைத்து, |
| படர்ந்தனை செல்லும் முதுவாய் இரவல | சேர மன்னனை நினைத்துச் செல்லுகின்ற முதுமை வாய்க்கப்பெற்ற இரவலனே! |
| இடி இசை முரசமொடு ஒன்றுமொழிந்து ஒன்னார் | இடியைப் போன்ற ஓசையையுடைய முரசத்தோடு, வஞ்சினம் கூறி, பகைவரின் |
| வேல் உடை குழூஉ சமம் ததைய நூறி | வேலை உடைய திரண்ட கூட்டத்தின் போரைச் சிதையும்படி அழித்து, |
| கொன்று புறம்பெற்ற பிணம் பயில் அழுவத்து | அவரைக் கொன்று, மீந்துள்ளோரின் புறமுதுகிடுதலைப் பெற்ற, பிணங்கள் செறிவாய்க் கிடக்கும் போர்க்களத்தில் |
| தொன்று திறை தந்த களிற்றொடு நெல்லின் | பகைவர் பழைய திறையாகத் தந்த களிற்றோடு, நெல்லின் |
| அம்பண அளவை விரிந்து உறை போகிய | மரக்காலின் அளவையால் அளந்து உறையிட முடியாத |
| ஆர் பதம் நல்கும் என்ப கறுத்தோர் | நிறைந்த உணவை அளிப்பான் என்று சொல்லுவர்; தான் கோபங்கொண்ட பகைவரின் |
| உறு முரண் தாங்கிய தார் அரும் தகைப்பின் | மிகுந்த பகைமையைத் தடுக்க வல்ல ஒழுங்கான அரிய அணிவகுப்பையுடைய, |
| நாள் மழை குழூஉ சிமை கடுக்கும் தோன்றல் | நாள்காலையில் மேகங்கள் கூடியுள்ள மலையுச்சியைப் போன்ற தோற்றத்தில் |
| தோல் மிசைத்து எழுதரும் விரிந்து இலங்கு எஃகின் | தோலால் ஆன கேடயங்களின் மேல் எழுந்துநிற்கும் பரந்து ஒளிவீசுகின்ற வேலையுடைய, |
| தார் புரிந்து அன்ன வாள் உடை விழவின் | மாலைகள் முறுக்கிக்கொள்வதைப் போல சுழல்கின்ற வாள்களை உடைய விழாவையுடைய, |
| போர் படு மள்ளர் போந்தொடு தொடுத்த | போரை மேற்கொள்ளும் வீரர்கள் பனங்குருத்தோடு சேர்ந்து தொடுத்த |
| கடவுள் வாகை துய் வீ ஏய்ப்ப | கொற்றவை வாழும் வாகை மரத்தின் உச்சியில் பஞ்சினைக் கொண்ட பூவைப் போலப் |
| பூத்த முல்லை புதல் சூழ் பறவை | பூத்திருக்கும் முல்லைக் கொடி படர்ந்த புதர்களைச் சூழவரும் வண்டினங்கள் |
| கடத்து இடை பிடவின் தொடை குலை சேக்கும் | காட்டுவெளியில் உள்ள பிடவமரத்தின் மாலைபோன்ற பூக்குலையில் சென்று தங்கும் |
| வான் பளிங்கு விரைஇய செம் பரல் முரம்பின் | வெண் பளிங்குக் கற்கள் கலந்துகிடக்கும் சிவந்த பருக்கைக் கற்களைக் கொண்ட மேட்டுநிலத்தில் |
| இலங்கு கதிர் திரு மணி பெறூஉம் | பளிச்சிடும் கதிர்களைக் கொண்ட அழகிய மணியை அங்குவாழ்வோர் பெறுகின்ற, |
| அகன் கண் வைப்பின் நாடு கிழவோனே | அகன்ற இடத்தையுடைய ஊர்களையுடைய – நாட்டுக்கு உரியவன். |
| # 67 பாட்டு 67 | # 67 பாட்டு 67 |
| கொடுமணம் பட்ட நெடுமொழி ஒக்கலொடு | கொடுமணம் என்ற ஊரில் இருக்கும் உயர்ந்த புகழைக்கொண்ட உன் சுற்றத்தாருடன், |
| பந்தர் பெயரிய பேர் இசை மூதூர் | பந்தல் என்ற பெயரைக் கொண்ட பெரிய புகழ்படைத்த முதிய ஊரைச் சேர்ந்த |
| கடன் அறி மரபின் கைவல் பாண | பாணர்க்குரிய கடமைகளை அறிந்த மரபில் வந்த கைதேர்ந்த பாணனே! |
| தெண் கடல் முத்தமொடு நன் கலம் பெறுகுவை | தெளிந்த கடலில் விளைந்த முத்துக்களோடு, நல்ல அணிகலன்களையும் பெறுவாய்! |
| கொல் படை தெரிய வெல் கொடி நுடங்க | வீரர்கள் கொல்லுகின்ற படைக்கலன்களைத் தெரிவுசெய்ய, வெற்றிக்கொடி அசைந்தாட, |
| வயங்கு கதிர் வயிரொடு வலம்புரி ஆர்ப்ப | ஒளிர்கின்ற கதிர்களையுடைய மணிகள் பதித்த கொம்புகளுடன், வலம்புரிச் சங்குகளும் முழங்க, |
| பல் களிற்று இன நிரை புலம் பெயர்ந்து இயல்வர | பலவான களிறுகளின் கூட்டம் வரிசை வரிசையாக தமக்குரிய இடத்தைவிட்டுப் பெயர்ந்து நடக்க, |
| அமர் கண் அமைந்த அவிர் நிண பரப்பின் | போரிடும் இடமாக அமைந்த மின்னுகின்ற கொழுப்புகள் பரந்து கிடக்கின்ற களத்தில் |
| குழூஉ சிறை எருவை குருதி ஆர | கூட்டமான, பெரிய சிறகுகள் கொண்ட பருந்துகள் குருதியைக் குடிக்க, |
| தலை துமிந்து எஞ்சிய ஆள் மலி யூபமொடு | தலை துண்டிக்கப்பட்டதால் எஞ்சி நிற்கும் ஆண்மை ததும்பும் குறையுடலோடு |
| உரு இல் பேய்_மகள் கவலை கவற்ற | அழகிய வடிவம் இல்லாத பேய்மகள் பார்ப்போருக்கு வருத்தத்தை உண்டாக்க, |
| நாடு உடன் நடுங்க பல் செரு கொன்று | நாடு முழுதும் நடுங்க, பல போர்களில் சிறப்பாகச் செயல்பட்டு, |
| நாறு இணர் கொன்றை வெண் போழ் கண்ணியர் | மணங்கமழும் பூங்கொத்தான கொன்றையுடன் வெண்மையான பனந்தோடு சேர்ந்து கட்டிய தலைமாலையும், |
| வாள் முகம் பொறித்த மாண் வரி யாக்கையர் | வாளின் கூரிய பக்கம் ஏற்படுத்திய சிறப்புப் பொருந்திய தழும்பினைக் கொண்ட உடம்பினையும் கொண்ட, |
| நெறி படு மருப்பின் இரும் கண் மூரியொடு | வளைவு வளைவாக அமைந்த கொம்பினையுடைய எருமை எருதுகளினுடையதும் |
| வளை தலை மாத்த தாழ் கரும் பாசவர் | வேறு வளைந்த தலைகளையுடைய விலங்குகளினுடையதுமான தாழ்ந்த இழிவான இறைச்சியை விற்போரின் |
| எஃகு ஆடு ஊனம் கடுப்ப மெய் சிதைந்து | வெட்டரிவாள் கொத்தியெடுத்த மரப்பலகையைப் போல மேனி சிதைவுற்று |
| சாந்து எழில் மறைத்த சான்றோர் பெருமகன் | பூசியிருக்கும் சந்தனத்தின் அழகை மறைக்கும்படியாயிருக்கின்ற வீரருடைய பெருமகனான – |
| மலர்ந்த காந்தள் மாறாது ஊதிய | பூத்திருக்கும் காந்தள் பூவில், அது தெய்வத்திற்குரியது என்று உணராமல், அதை விட்டு விலகாமல் தேனையுண்ட |
| கடும் பறை தும்பி சூர் நசை தாஅய் | விரைவாகப் பறக்கும் தும்பியானது, அந்தப் பூக்களைத் தெய்வம் விரும்புவதால் |
| பறை பண் அழியும் பாடு சால் நெடு வரை | தமது பறக்கின்ற பண்பினை இழக்கும் பெருமை சான்ற நெடிய மலையாகிய |
| கல் உயர் நேரி பொருநன் | பாறைகளால் உயர்ந்த நேரி என்னும் மலைக்கு உரியவனான, |
| செல்வக்கோமான் பாடினை செலினே | செல்வக் கோனுமாகிய வாழியாதனைப் பாடினவனாகச் சென்றால் – |
| # 68 பாட்டு 68 | # 68 பாட்டு 68 |
| கால் கடிப்பு ஆக கடல் ஒலித்து ஆங்கு | காற்றே குறுந்தடியாய் மோதியடிக்க, கடல் பேரொலி எழுப்புவதைப் போல |
| வேறு புலத்து இறுத்த கட்டூர் நாப்பண் | பகைவர் நாட்டினில் எழுப்பித் தங்கியிருக்கும் பாசறையின் நடுவே |
| கடும் சிலை கடவும் தழங்கு குரல் முரசம் | மிகுந்த முழக்கத்தைச் செய்யும் ஒலிக்கின்ற ஓசையையுடைய முரசமானது |
| அகல் இரு விசும்பின் ஆகத்து அதிர | விரிந்த பெரிய வானத்து நடுவில் அதிர்ந்து முழங்க, |
| வெ வரி நிலைஇய எயில் எறிந்து அல்லது | கண்டோர் விரும்பும் அழகிய கோலங்கள் நிலையாய் அமைந்த பகைவர் மதிலை அழித்தாலொழிய |
| உண்ணாது அடுக்கிய பொழுது பல கழிய | உண்பதில்லை என்று அடுக்கிக்கொண்டே சென்ற நாள்கள் பல கழிய, |
| நெஞ்சு புகல் ஊக்கத்தர் மெய் தயங்கு உயக்கத்து | நெஞ்சம் போரையே விரும்பும் ஊக்கத்தையுடையவராய், உடல்வலிமை குன்றி துன்புற்று இருக்கும் |
| இன்னார் உறையுள் தாம் பெறின் அல்லது | பகைவரின் உறைவிடத்தைத் தாம் கைப்பற்றினால்தான், |
| வேந்து ஊர் யானை வெண் கோடு கொண்டு | பகை மன்னர் ஏறிவரும் யானையைக் கொன்று அதன் வெண்மையான கொம்பினைத் தோண்டியெடுத்து, |
| கள் கொடி நுடங்கும் ஆவணம் புக்கு உடன் | கள்ளுக்கடையின் கொடி அசைந்தாடும் கடைத்தெருவில் நுழைந்து உடனே |
| அரும் கள் நொடைமை தீர்ந்த பின் மகிழ் சிறந்து | அரிய கள்ளுக்கு விலையாகத் தந்து கள்ளைப் பெற்று, பின் அதனைக் குடித்து மகிழ்ந்து |
| நாமம் அறியா ஏம வாழ்க்கை | அச்சம் என்பதே அறியாத இன்பமான வாழ்க்கையையுடைய |
| வட புலம் வாழ்நரின் பெரிது அமர்ந்து அல்கலும் | வட நாட்டில் வாழ்பவரைப் போன்று பெரிதும் அமைதியாக இருந்து நாள்தோறும் |
| இன் நகை மேய பல் உறை பெறுப-கொல் | இனிய மகிழ்ச்சி பொங்கும் பல பொழுதுகளைப் பெறுவார்களோ? |
| பாயல் இன்மையின் பாசிழை ஞெகிழ | பிரிவுத் துயரத்தால் தூக்கம் இல்லாததால், தம் பசிய இழைகள் நெகிழ்ந்துபோக |
| நெடு மண் இஞ்சி நீள் நகர் வரைப்பின் | உயரமான, மண்ணால் செய்யப்பட்ட மதில் சூழ்ந்த நீண்ட பெரிய வீட்டின் எல்லையில் |
| ஓவு உறழ் நெடும் சுவர் நாள் பல எழுதி | ஓவியத்தில் உள்ளதைப் போன்ற நெடிய சுவரில் நாள்கள் பலவற்றைக் கோட்டால் குறித்துவைப்பதால் |
| செ விரல் சிவந்த அம் வரி குடைச்சூல் | சிவந்த விரல்கள் மேலும் சிவந்து போன அழகிய வரிகளையும், சிலம்பையும் |
| அணங்கு எழில் அரிவையர் பிணிக்கும் | காண்பாரை வருத்தும் அழகையும் உடைய மகளிரின் மனத்தைத் தன்வயப்படுத்தும் |
| மணம் கமழ் மார்ப நின் தாள் நிழலோரே | சந்தனத்தின் மணம் கமழும் மார்பினையுடையவனே! உன் காலடி நிழலில் வாழும் உன் வீரர்கள் – |
| # 69 பாட்டு 69 | # 69 பாட்டு 69 |
| மலை உறழ் யானை வான் தோய் வெல் கொடி | மலை போன்ற யானைகளின் மேல் வானத் தொடும்படி எடுத்த வெற்றிக்கொடி |
| வரை மிசை அருவியின் வயின்_வயின் நுடங்க | மலை மேலிருந்து இறங்கும் அருவியைப் போல அங்கங்கே அசைந்தாடிக்கொண்டிருக்க, |
| கடல் போல் தானை கடும் குரல் முரசம் | கடல் போன்ற சேனையின் நடுவே பெரும் முழக்கத்தை எழுப்பும் முரசம் |
| கால் உறு கடலின் கடிய உரற | காற்றால் அலைகழிக்கப்படும் கடலைப் போல பெரியதாய் முழங்க, |
| எறிந்து சிதைந்த வாள் | பகைவரை வெட்டியதால் சிதைந்துபோன வாள்வீரரும், |
| இலை தெரிந்த வேல் | இலையைப் போன்ற வேலின்தலையை உயர்த்திப் பிடித்த வேல்வீரரும், |
| பாய்ந்து ஆய்ந்த மா | பகைவர் மேல் பாய்வதால் வருத்தமடைந்த குதிரைகளும், |
| ஆய்ந்து தெரிந்த புகல் மறவரொடு | பகைவரைத் தேடிப்பிடித்துப் போரிடும் போரவா மிகுந்த வீரர்களும் ஆகிய படையுடன் சென்று, |
| படு பிணம் பிறங்க நூறி பகைவர் | வெட்டுப்பட்டு விழுகின்ற பிணங்கள் குவிந்து உயரும்படி பகைவர்களைக் கொன்று, அவரின் |
| கெடு குடி பயிற்றிய கொற்ற வேந்தே | கெட்டுப்போன குடிமக்களை வாழச்செய்த வெற்றி வேந்தனே! |
| நின் போல் அசைவு இல் கொள்கையர் ஆகலின் அசையாது | உன்னைப்போல் தோல்வி இல்லாத நெறிமுறையை உடையவராதலால், தளர்வின்றி |
| ஆண்டோர் மன்ற இ மண் கெழு ஞாலம் | ஆண்டார்கள், உறுதியாக, இந்த மண் செறிந்த நிலவுலகத்தை – |
| நிலம் பயம் பொழிய சுடர் சினம் தணிய | நிலங்கள் மிக்க பலனை விளைவிக்க, வெயிலின் வெம்மை தணிந்து நிலவ, |
| பயம் கெழு வெள்ளி ஆநியம் நிற்ப | உலகுக்கு நல்ல பயனைத் தரும் வெள்ளியாகிய கோள் மழைக்குரிய நிலையில் நிற்க, |
| விசும்பு மெய் அகல பெயல் புரவு எதிர | ஆகாயம் தன் இடம் அகன்று தோன்றுமாறு மேகங்கள் மழைபெய்து உலகைக் காக்க, |
| நால் வேறு நனம் தலை ஓராங்கு நந்த | நான்காக வேறுபட்டு நிற்கும் அகன்ற இடங்களாகிய திசைகள் ஒன்றுபோல ஈட்டம் பெற, |
| இலங்கு கதிர் திகிரி முந்திசினோரே | ஒளிரும் கதிர்களைக் கொண்ட அரசாணையாகிய அரசசக்கரத்தைச் செலுத்திய உன் முன்னோர்கள். |
| # 70 பாட்டு 70 | # 70 பாட்டு 70 |
| களிறு கடைஇய தாள் | களிறுகளைச் செலுத்திய கால்களையும், |
| மா உடற்றிய வடிம்பு | குதிரைகளைப் போரிடுவதற்குச் செலுத்திய காலின் முன்பகுதியையும், |
| சமம் ததைந்த வேல் | பகைவரின் போரைச் சிதைத்த வேலினையும், |
| கல் அலைத்த தோள் | பெரிய கற்களைத் தூக்கிப் பயிற்சிசெய்த தோள்களையும், |
| வில் அலைத்த நல் வலத்து | வில்லினால் பகைவரை வருத்திய நல்ல வெற்றியினையும் கொண்ட, |
| வண்டு இசை கடாவா தண் பனம் போந்தை | வண்டுகள் மொய்த்து இசையை வெளிப்படுத்தாத குளிர்ச்சியான பனையாகிய போந்தையின், |
| குவி முகிழ் ஊசி வெண் தோடு கொண்டு | குவிந்த அரும்புகளைக் கொண்ட, ஊசிபோல் கூர்மையான, வெண்மையான குருத்தினைக் கொண்டு |
| தீம் சுனை நீர் மலர் மலைந்து மதம் செருக்கி | இனிய சுவையுள்ள சுனைநீரின் மலர்களைக் கண்ணியாகச் செய்து சூடி, இறுமாப்புடன் செருக்கி, |
| உடை நிலை நல் அமர் கடந்து மறம் கெடுத்து | தனக்கே உரித்தானதாகப் பெற்ற நிலையையுடைய நல்ல போர்களை வென்று, எதிர்ப்போரின் வீரத்தை அழித்து, |
| கடும் சின வேந்தர் செம்மல் தொலைத்த | மிக்க சினத்தையுடைய வேந்தர்களின் தலைமையினையும் இல்லாமற்செய்த |
| வலம் படு வான் கழல் வயவர் பெரும | வெற்றி பொருந்திய பெரிய கழல் அணிந்த வீரர்களுக்குத் தலைவனே! |
| நகையினும் பொய்யா வாய்மை பகைவர் | விளையாட்டுக்கும் பொய்கூறாத வாய்மையினையும், பகைவரின் |
| புறஞ்சொல் கேளா புரை தீர் ஒண்மை | ஒளிவுமறைவான இகழ்ச்சிப்பேச்சையும் கேளாத குற்றம் நீங்கிய அறிவினையும் கொண்ட – |
| பெண்மை சான்று பெரு மடம் நிலைஇ | நாணம் நிறைந்து, பெருமளவு கபடமின்மை நிலைபெற்று, |
| கற்பு இறைகொண்ட கமழும் சுடர் நுதல் | கற்பு நிலையாகத் தங்கின, மணங்கமழும் ஒளிபொருந்திய நெற்றியையுடைய, |
| புரையோள் கணவ பூண் கிளர் மார்ப | சிறந்தவளுக்குக் கணவனே! – பூண்கள் அணிந்த மார்பினையுடையவனே! |
| தொலையா கொள்கை சுற்றம் சுற்ற | கொண்ட கொள்கையில் உறுதியாய் நிற்கும் சான்றோராகிய சுற்றம் உன்னைச் சூழ இருக்க, |
| வேள்வியில் கடவுள் அருத்தினை கேள்வி | வேள்விகளைச் செய்து இறைவர்க்குப் பலியூட்டினாய்! முன்னோர் சொல்லக் கேள்விப்பட்ட |
| உயர்_நிலை_உலகத்து ஐயர் இன்புறுத்தினை | உயர்ந்த நிலையுள்ள உலகமான விண்ணுலகில் இருப்போரை மகிழ்வித்தாய்! |
| வணங்கிய சாயல் வணங்கா ஆண்மை | சான்றோரை வணங்கும் மென்மையான உள்ளமும், பகைவரை வணங்காத ஆண்மைத் திறமும் கொண்டு, |
| இளம் துணை புதல்வரின் முதியர் பேணி | இளம் துணைவராகிய புதல்வரைப் பெற்று, முதியோரைப் பேணி, |
| தொல் கடன் இறுத்த வெல் போர் அண்ணல் | தொன்றுதொட்ட உன் கடமையைத் தவறாது செய்யும், வெல்லுகின்ற போரையுடைய அண்ணலே! |
| மாடோர் உறையும் உலகமும் கேட்ப | தேவர்கள் வாழும் விண்ணுலகத்திலும் கேட்கும்படியாக |
| இழுமென இழிதரும் பறை குரல் அருவி | இழும் என்ற ஒலியுடன் விழுகின்ற பறை முழக்கத்தைக் கொண்ட அருவியோசை |
| முழு_முதல் மிசைய கோடு-தொறும் துவன்றும் | மிகப் பெரிதான உச்சியையுடைய மலைச் சிகரமெங்கும் நிறைந்து விளங்கும் |
| அயிரை நெடு வரை போல | அயிரை என்னும் நெடிய மலையைப் போல |
| தொலையாது ஆக நீ வாழும் நாளே | குறையாது பெருகுவதாக நீ வாழும் நாள்கள். |
| எட்டாம் பத்து | எட்டாம் பத்து |
| அரிசில் கிழார் | அரிசில் கிழார் |
| # 71 பாட்டு 71 | # 71 பாட்டு 71 |
| அறாஅ யாணர் அகன் கண் செறுவின் | தீர்ந்துபோகாத புதுவருவாயையுடைய அகன்ற இடமான வயல்களில் |
| அருவி ஆம்பல் நெய்தலொடு அரிந்து | நிறைந்து இருக்கும் ஆம்பல், நெய்தல் ஆகிய பூக்களை நெற்கதிர்களோடு அறுத்து, |
| செறு வினை மகளிர் மலிந்த வெக்கை | வயல்வேலை செய்யும் மகளிர் மிகுந்திருக்கும் நெற்களத்தில் |
| பரூஉ பகடு உதிர்த்த மென் செந்நெல்லின் | பெருத்த எருதுகள் போரடிக்குபோது மிதித்து உதிர்த்த மென்மையான செந்நெல்லின் |
| அம்பண அளவை உறை குவித்து ஆங்கு | மரக்கால் அளவைகளைப் பத்தாயத்தில் குவித்து வைத்ததைப் போன்ற, |
| கடும் தேறு உறு கிளை மொசிந்தன துஞ்சும் | கடுமையாகக் கொட்டுதலைச் செய்யும் கூட்டமான குளவிகள் மொய்த்தவாறு தங்கியிருக்கும் |
| செழும் கூடு கிளைத்த இளம் துணை மகாரின் | செழுமையான குளவிக்கூட்டைக் கலைத்த பெற்றோர்க்கு இளமைத் துணையான சிறுவர்களைப் போன்று |
| அலந்தனர் பெரும நின் உடற்றியோரே | துன்பப்பட்டனர், பெருமானே! உன்னைக் கோபப்படுத்தியவர்கள்; |
| ஊர் எரி கவர உருத்து எழுந்து உரைஇ | நெருப்பு, பகைவர் ஊர்களைக் கவர்ந்துகொள்ளுமாறு, சினந்து மேலெழுந்து உன் கோபத்தைத் தெரிவிக்க, |
| போர் சுடு கமழ் புகை மாதிரம் மறைப்ப | போரில் சுடுகின்ற புகைநாற்றம் கமழும் புகை திசைகளையெல்லாம் மறைக்க, |
| மதில் வாய் தோன்றல் ஈயாது தம் பழி ஊக்குநர் | மதில்களுக்குள்ளே இருந்து, வெளியில் வராமல், தமது பழியை மிகுதிப்படுத்திக்கொள்பவர்களின் |
| குண்டு கண் அகழிய குறும் தாள் ஞாயில் | ஆழமான இடத்தையுடைய அகழியையும், குறுகிய படிகளையும் கொண்ட கோட்டை முகப்பினையுடைய |
| ஆர் எயில் தோட்டி வௌவினை ஏறொடு | கடத்தற்கு அரிய மதிலின் காவலை அழித்துக் கவர்ந்துகொண்டாய்! காளைகளுடன் |
| கன்று உடை ஆயம் தரீஇ புகல் சிறந்து | கன்றுகளையும் உடைய பசுக்கூட்டங்களைக் கவர்ந்து கொண்டுவந்து, அவற்றின் மேல் விருப்பம் மிக்கு, |
| புலவு வில் இளையர் அங்கை விடுப்ப | புலால் நாறும் வில்லையுடைய வெட்சிவீரர் அவற்றை விடுவிக்க |
| மத்து கயிறு ஆடா வைகல் பொழுது நினையூஉ | தயிர் கடையும் மத்து கயிற்றினில் சுழலாத விடியற்காலத்தே, உன்னை நினைத்து வந்து, |
| ஆன் பயம் வாழ்நர் கழுவுள் தலைமடங்க | பசுக்களின் பயனைக் கொண்டு வாழும் இடையர்களின் கழுவுள் என்னும் தலைவன் தலைவணங்கி நிற்க, |
| பதி பாழ் ஆக வேறு புலம் படர்ந்து | செல்லுகின்ற ஊர்கள் பாழ்பட்டுப்போகும்படி, வேறு இடத்தை நோக்கிச் சென்று, |
| விருந்தின் வாழ்க்கையொடு பெரும் திரு அற்று என | புதிதாகத் தாம் தேடிய செல்வத்தோடு, தமது முன்னோர் தேடிவத்த பெரும் செல்வமும் அழிந்துபோயின என்று, |
| அரும் சமத்து அரு நிலை தாங்கிய புகர் நுதல் | வெல்லுதற்கரிய போரில் அரிய நிலையை எதிர்த்து நின்று தடுக்கும் புள்ளிகள் கொண்ட நெற்றியையுடைய |
| பெரும் களிற்று யானையொடு அரும் கலம் தராஅர் | பெரிய ஆண்யானைகளோடு, அருமையான அணிகலன்களையும் திறையாகத் தந்து, |
| மெய் பனி கூரா அணங்கு என பராவலின் | மேனி மிகவும் நடுக்கமுற்று, தெய்வமேயென்று உன்னைப் புகழ்ந்து நிற்க, |
| பலி கொண்டு பெயரும் பாசம் போல | பலியுணவை மட்டும் எடுத்துக்கொண்டு செல்லும் பேய் போல, |
| திறை கொண்டு பெயர்தி வாழ்க நின் ஊழி | பகைவரின் திறையைமட்டும் எடுத்துக்கொண்டு மீளுகின்றாய்! வாழ்க உன் வாழ்நாள்! |
| உரவரும் மடவரும் அறிவு தெரிந்து எண்ணி | அறிவுடையோர்க்கும், அறிவில்லாதோர்க்கும், அவரின் அறிவின் அளவைத் தெரிந்து எண்ணி |
| அறிந்தனை அருளாய் ஆயின் | அவரவர் தகுதிக்கேற்பச் செய்யாவிட்டால் |
| யார் இவண் நெடுந்தகை வாழுமோரே | நெடுந்தகையே! யார்தாம் இங்கு வாழ்வார்? |
| # 72 பாட்டு 72 | # 72 பாட்டு 72 |
| இகல் பெருமையின் படை கோள் அஞ்சார் | பகைமையுணர்வு மிகுந்திருப்பதால் படையெடுத்து வருவதற்கு அஞ்சாதவராய், |
| சூழாது துணிதல் அல்லது வறிது உடன் | ஆராயாமல் போர்செய்யத் துணிவதே அல்லாமல், சிறிதளவும், பலரும் கூடி |
| காவல் எதிரார் கறுத்தோர் நாடு நின் | தம் நாட்டைக் காப்பதற்கு இயலாதவர் உன்னைப் பகைத்தவர்; உன் |
| முன் திணை முதல்வர்க்கு ஓம்பினர் உறைந்து | குலத்தில் முன்னாக இருந்த முன்னோர்களுக்குப் பாதுகாப்பாயிருந்து |
| மன்பதை காப்ப அறிவு வலியுறுத்தும் | உலகத்து மக்களைக் காக்கும் நெறிமுறைகளை எடுத்துக்கூறும் |
| நன்று அறி உள்ளத்து சான்றோர் அன்ன நின் | நல்லவற்றை அறிந்த உள்ளத்தையுடைய சான்றோரைப் போன்ற உன் |
| பண்பு நன்கு அறியார் மடம் பெருமையின் | பண்புகளை நன்கு அறியமாட்டார், அறியாமை மிகுந்திருப்பதால் |
| துஞ்சல் உறூஉம் பகல் புகு மாலை | எல்லா உயிர்களும் இறக்கின்ற ஊழிக்காலம் நுழைகின்ற போதில் |
| நிலம் பொறை ஒராஅ நீர் ஞெமர வந்து ஈண்டி | நிலம் தன் பாரத்தைக் குறைத்துக்கொள்ளும் வகையில், வெள்ளம் பரந்து நிறைந்து வந்து கூடி, |
| உரவு திரை கடுகிய உருத்து எழு வெள்ளம் | வலிய அலைகள் கடுமையாகச் சினந்து எழுந்துவருமாறு, ஊழிப் பெருவெள்ளம் |
| வரையா மாதிரத்து இருள் சேர்பு பரந்து | எல்லைகளே தோன்றாத திசைகளிலெல்லாம் இருளுடன் சேர்ந்து பரவி நிற்க, |
| ஞாயிறு பட்ட அகன்று வரு கூட்டத்து | ஞாயிறு தோன்றி, பன்னிரண்டாய் விரிந்து வரும் கூட்டத்தில், |
| அம் சாறு புரையும் நின் தொழில் ஒழித்து | அழகிய விழாவைப் போன்று இன்பந்தரும் உன் வழக்கமான தொழிலை விடுத்து, |
| பொங்கு பிசிர் நுடக்கிய செம் சுடர் நிகழ்வின் | பொங்கியெழும் பிசிரினையுடைய வெள்ளத்தை வற்றச் செய்யும் சிவந்த சுவாலைகளோடு தோன்றும் |
| மடங்கல் தீயின் அனையை | ஊழிப்பெருந்தீயைப் போன்றவன், |
| சினம் கெழு குருசில் நின் உடற்றிசினோர்க்கே | சினம் பொருந்திய குருசிலே! உன்னைக் கோபப்படுத்தியவர்களுக்கு. |
| # 73 பாட்டு 73 | # 73 பாட்டு 73 |
| உரவோர் எண்ணினும் மடவோர் எண்ணினும் | அறிவுடையோர் நினைத்துப்பார்த்தாலும், அறிவில்லாதர் நினைத்துப்பார்த்தாலும் |
| பிறர்க்கு நீ வாயின் அல்லது நினக்கு | பிறர்க்கு நீ ஒப்புமையாக அமைவதல்லாமல், உனக்குப் |
| பிறர் உவமம் ஆகா ஒரு பெரு வேந்தே | பிறர் ஒப்புமை ஆகாத தனிச் சிறப்பு வாய்ந்த வேந்தனே! |
| கூந்தல் ஒண் நுதல் பொலிந்த | — கூந்தலிலும், ஒளிவிடும் நெற்றியிலும் அழகுற அமைந்த |
| நிறம் திகழ் பாசிழை உயர்திணை மகளிரும் | வண்ணமயமான புதிய அணிகலன்களை அணிந்த குல மகளிரும், |
| தெய்வம் தரூஉ நெஞ்சத்து ஆன்றோர் | தெய்வத்தன்மையைத் தரும் நெஞ்சினைக் கொண்ட ஆன்றோர் —- |
| மருதம் சான்ற மலர் தலை விளை வயல் | மருத வளம் அமைந்த விரிந்த இடத்தையுடைய விளைநிலங்களாகிய |
| செய்யுள் நாரை ஒய்யும் மகளிர் | வயல்களுக்குள் நாரைகளை விரட்டும் மகளிர் |
| இரவும் பகலும் பாசிழை களையார் | இரவும் பகலும் தம் புத்தம்புதிய அணிகலன்களைக் கழற்றாதவராய் |
| குறும் பல் யாணர் குரவை அயரும் | அருகருகே அமைந்துள்ள பல புதுப்புது இடங்களில் குரவைக் கூத்தினை ஆடி மகிழும், |
| காவிரி மண்டிய சேய் விரி வனப்பின் | காவிரி பெருக்கெடுத்துச் சென்று தொலைவில் பரந்து விரிகின்ற அழகினையுடைய |
| புகாஅர் செல்வ பூழியர் மெய்ம்மறை | புகார் நகரத்தையுடைய செல்வனே! பூழி நாட்டிலுள்ளவர்களின் கவசம் போன்றவனே! |
| கழை விரிந்து எழுதரு மழை தவழ் நெடும் கோட்டு | மூங்கில்கள் விரிந்து எழுகின்ற மேகங்கள் தவழும் உயர்ந்த சிகரங்களையுடைய |
| கொல்லி பொருந கொடி தேர் பொறைய நின் | கொல்லி மலைக்குத் தலைவனே! கொடிகளையுடைய தேரையுடைய சேரனே! உன் |
| வளனும் ஆண்மையும் கைவண்மையும் | செல்வமும், வீரமும், வள்ளண்மையும் |
| மாந்தர் அளவு இறந்தன என பல் நாள் | மக்களின் எண்ணிக்கையைக் காட்டிலும் அதிகமாயின என்று பல நாள்கள் |
| யான் சென்று உரைப்பவும் தேறார் பிறரும் | நான் சென்று உன் பகைவரிடம் சொல்லவும் அவர்கள் அவற்றை உணரமாட்டார்; வேறு |
| சான்றோர் உரைப்ப தெளிகுவர்-கொல் என | சான்றோர்கள் சொன்னால் உணர்ந்துகொள்வாரோ என்று கருதினால் |
| ஆங்கும் மதி மருள காண்குவல் | அவ்வாறு சொன்னபோதும் மதி மயங்கி இருக்கக் கண்டேன்; |
| யாங்கு உரைப்பேன் என வருந்துவல் யானே | எவ்விதம் அவருக்கு எடுத்துச் சொல்வேன் என்று வருந்துகிறேன் நான். |
| # 74 பாட்டு 74 | # 74 பாட்டு 74 |
| கேள்வி கேட்டு படிவம் ஒடியாது | வேதங்களைச் சொல்லக்கேட்டு, விரதங்களை இடைவிடாமல் கைக்கொண்டு |
| வேள்வி வேட்டனை உயர்ந்தோர் உவப்ப | வேள்விகளைச் செய்து முடித்தாய், உயர்ந்தவர்கள் மனம் மகிழ; |
| சாய் அறல் கடுக்கும் தாழ் இரும் கூந்தல் | நுண்ணிய கருமணலைப் போன்ற, தாழ்ந்து இறங்கும் கரிய கூந்தலைக் கொண்ட |
| வேறு படு திருவின் நின் வழி வாழியர் | திருமகளினின்றும் வேறு பட்ட மற்றொரு திருமகளாகிய உன் தேவி உன் குலம் வாழும்பொருட்டு – |
| கொடுமணம் பட்ட வினை மாண் அரும் கலம் | கொடுமணம் என்ற ஊரில் இருக்கும் வேலைப்பாட்டினில் சிறந்த அரிய அணிகலன்களையும், |
| பந்தர் பயந்த பலர் புகழ் முத்தம் | பந்தல் என்ற ஊர் தந்த பலரும் புகழும் முத்துக்களையும், |
| வரை_அகம் நண்ணி குறும் பொறை நாடி | பெரிய மலைகளின் சென்று, சிறிய குன்றுகளில் தேடி, |
| தெரியுநர் கொண்ட சிரறு உடை பைம் பொறி | அலைந்துதிரிவோர் பிடித்துக்கொண்டு வந்த பரவலான பளிச்சென்ற புள்ளிகளையுடைய, |
| கவை மரம் கடுக்கும் கவலைய மருப்பின் | கிளைத்துப் பிரிந்த கோலைப் போன்ற பிளவுபட்ட கொம்பினையுடைய, |
| புள்ளி_இரலை தோல் ஊன் உதிர்த்து | புள்ளி மானின் தோலை உரித்து, அதினின்றும் ஊனை நீக்கி, |
| தீது களைந்து எஞ்சிய திகழ் விடு பாண்டில் | தீய பாகங்களைக் களைந்துபோட்டு, எஞ்சிய வட்டமாக அறுத்த ஒளிவிடும் தோலின் |
| பருதி போகிய புடை கிளை கட்டி | சுற்றளவாய் அமைந்த விளிம்பில் வகை வகையாகக் கட்டி, |
| எஃகு உடை இரும்பின் உள் அமைத்து வல்லோன் | கூர்மையை உடைய ஊசியால், உள்புறத்தில் தைத்து, தொழிலில் வல்லவன் |
| சூடு நிலை உற்று சுடர்விடு தோற்றம் | சூடுவதற்குரிய நிலையை உண்டாக்கி, ஒளி திகழும் தோற்றத்தை உண்டாக்குவதால் |
| விசும்பு ஆடு மரபின் பருந்து ஊறு அளப்ப | விசும்பில் பறக்கும் வழக்கத்தையுடைய பருந்து ஊன் என்று கொத்தித்தின்ன முனையும்படியாக |
| நலம் பெறு திரு மணி கூட்டும் நல் தோள் | மணிகளுக்குரிய இலக்கணங்களைப் பெற்ற அழகிய மணி சேர்ந்த நல்ல தோளையும், |
| ஒடுங்கு ஈர் ஓதி ஒண் நுதல் கருவில் | ஒடுங்கிய சுருள் என்னும் பகுதியான கூந்தலையும், ஒளிவிடும் நெற்றியையும் கொண்ட உன் தேவி – கருவில் அமைத்து |
| எண் இயல் முற்றி ஈர் அறிவு புரிந்து | எண்ணப்படும் மாதங்கள் பத்தும் முடிவடைந்து, இருவகை அறிவும் அமைந்து, |
| சால்பும் செம்மையும் உளப்பட பிறவும் | நற்பண்புகளும் நடுவுநிலைமையும் உள்ளிட்ட பிற பண்புகளும், |
| காவற்கு அமைந்த அரசு துறைபோகிய | நாட்டினைக் காப்பதற்கு அமைந்த அரசியலறிவு முதலியவற்றையும் கற்றுத் தேர்ந்த |
| வீறு சால் புதல்வன் பெற்றனை இவணர்க்கு | சிறப்பு நிறைந்த புதல்வனைப் பெற்றுள்ளாய், இந்த உலகத்து மக்களுக்கு; |
| அரும் கடன் இறுத்த செரு புகல் முன்ப | அரசர்க்குரிய அரிய கடமைகளைச் செய்து முடித்த, போரினை விரும்பும் வலிமையுடையவனே! |
| அன்னவை மருண்டனென் அல்லேன் நின்_வயின் | மேற்கூறிய கேள்வி, வேள்வி, மக்கட்பேறு ஆகிய அவற்றைக் கண்டு வியப்புறவில்லை, உன்னிடம்; |
| முழுது உணர்ந்து ஒழுக்கும் நரை மூதாளனை | உணரத் தக்கவற்றை முழுதும் உணர்ந்து, பிறரையும் நன்னெறியில் ஒழுகச்செய்யும் நரை கொண்ட முதுமையான புரோகிதனை,, |
| வண்மையும் மாண்பும் வளனும் எச்சமும் | கொடையும், மாட்சிமையும், செல்வமும், மகப்பேறும், |
| தெய்வமும் யாவதும் தவம் உடையோர்க்கு என | தெய்வ உணர்வும் ஆகிய யாவையும் தவப்பயன் பெறுவோர்க்கே என்று அறிவுறுத்தி |
| வேறு படு நனம் தலை பெயர | நாட்டிலிருந்து வேறுபட்ட அகன்ற இடமாகிய காட்டுக்குத் தவத்தினை மேற்கொண்டு செல்லும்படி |
| கூறினை பெரும நின் படிமையானே | கூறி அனுப்பிவைத்தாய், பெருமானே! உன் தவ ஒழுக்கத்தால். |
| # 75 பாட்டு 75 | # 75 பாட்டு 75 |
| இரும் புலி கொன்று பெரும் களிறு அடூஉம் | பெரிய புலியைக் கொன்று, அதன்மேலும் பெரிய ஆண்யானையைக் கொல்லும் |
| அரும் பொறி வய_மான் அனையை பல் வேல் | அரிய வரிவரியான மயிரினைக் கொண்ட வலிமையான சிங்கத்தைப் போன்றவனே! பலவான வேற்படையினையும், |
| பொலம் தார் யானை இயல் தேர் பொறைய | பொன்னால்செய்த மாலையை அணிந்த யானையையும், இலக்கணம் அமைந்த தேரினையும் உடைய இரும்பொறையே! |
| வேந்தரும் வேளிரும் பிறரும் கீழ்ப்பணிந்து | முடியுடை வேந்தரும், குறுநில மன்னரும், பிறரும் உன்னைக் கீழ்ப்பணிந்து |
| நின் வழிப்படார் ஆயின் நெல் மிக்கு | உன் விருப்பப்படி நடக்காவிட்டால், நெல் மிகுதியாய் விளைய, |
| அறை_உறு கரும்பின் தீம் சேற்று யாணர் | வெட்டப்பட்ட கரும்பின் இனிய சாறாகிய புதுவருவாயினை |
| வருநர் வரையா வளம் வீங்கு இருக்கை | வருவோர்க்கு அளவின்றிக் கொடுக்கும் செல்வம் பெருகியிருக்கும் குடியிருப்புகள் |
| வன்_புலம் தழீஇ மென்பால்-தோறும் | வன்புலத் தன்மை பெற்று, மருதநிலங்கள்தோறும் |
| அரும் பறை வினைஞர் புல் இகல் படுத்து | அரிய பறையையுடைய வேட்டுவர் புல்லிய போரில் ஈடுபட்டு, |
| கள் உடை நியமத்து ஒள் விலை கொடுக்கும் | கள் இருக்கும் கடைத்தெருவில் நல்ல விலைக்குக் கொடுக்கும் |
| வெள் வரகு உழுத கொள் உடை கரம்பை | உழுது விதைத்துப் பெற்ற வெள்ளை வரகும், கொள்ளும் உடைய களர்நிலம் ஆகி, |
| செந்நெல் வல்சி அறியார் தத்தம் | அங்குள்ளோர் செந்நெல் உணவினை அறியமாட்டார்; எனவே, அவரவருடைய, |
| பாடல் சான்ற வைப்பின் | புகழ் பெற்ற ஊர்களையுடைய |
| நாடு உடன் ஆள்தல் யாவணது அவர்க்கே | நாடுகளை ஒருசேர ஆளுவது எவ்வாறு இயலும் அவருக்கு. |
| 76 பாட்டு 76 | 76 பாட்டு 76 |
| களிறு உடை பெரும் சமம் ததைய எஃகு உயர்த்து | களிறுகளைக் கொண்டு செய்யும் பெரும் போர் சிதைந்துபோகும்படி, வேலையும் வாளையும் உயர்த்திப் பிடித்து, |
| ஒளிறு வாள் மன்னர் துதை நிலை கொன்று | ஒளிவிடும் வாளையுடைய பகைமன்னர்கள் சேர்ந்துவந்து போரிடும் நிலையை அழித்து, |
| முரசு கடிப்பு அடைய அரும் துறை போகி | வெற்றி முரசு குறுந்தடியால் அடிக்கப்பெற, அரிய பல போர்த்துறைகளைக் கடந்துசென்று, |
| பெரும் கடல் நீந்திய மரம் வலி_உறுக்கும் | பெரிய கடலில் சென்றுவந்த மரக்கலத்தினைப் பழுதுநீக்கி மீண்டும் வலிமைப்படுத்தும் |
| பண்ணிய விலைஞர் போல புண் ஒரீஇ | பொருள்கள் விற்கும் கடல்வாணிகர் போலப் போரில் ஏற்பட்ட புண்களை ஆற்றி, |
| பெரும் கை தொழுதியின் வன் துயர் கழிப்பி | பெரிய கைகளைக் கொண்ட கூட்டமான யானைகளின் கடுமையான துயரத்தைப் போக்கி, |
| இரந்தோர் வாழ நல்கி இரப்போர்க்கு | இரந்து வந்தவர் வாழும்படியாக அவர்களுக்குக் கொடுத்து, பின்னர் வந்து இரப்போர்க்கும் |
| ஈதல் தண்டா மா சிதறு இருக்கை | ஈதலில் குறையாத குதிரைகளை வாரி வழங்கும் உன் பாசறை இருப்பினைக் |
| கண்டனென் செல்கு வந்தனென் கால்கொண்டு | கண்டு செல்வதற்கு வந்தேன்! |
| கருவி வானம் தண் தளி சொரிந்து என | இடிமின்னலோடு மேகங்கள் குளிர்ந்த நீர்த்துளிகளைச் சொரிய |
| பல் விதை உழவின் சில் ஏராளர் | மிகுதியாக விதைப்பதற்கேற்ற உழவடையை உடைய சில ஏர்களை உடைய உழவர்கள் |
| பனி துறை பகன்றை பாங்கு உடை தெரியல் | குளிர்ந்த நீர்த்துறையில் மலர்ந்துள்ள பகன்றை மலரால் தொடுத்த அழகான மாலையை |
| கழுவு_உறு கலிங்கம் கடுப்ப சூடி | வெளுக்கப்பட்ட வெள்ளை ஆடையைப் போல் தலையில் சூடிக்கொண்டு, |
| இலங்கு கதிர் திரு மணி பெறூஉம் | உழுவதால் புரண்டு விழுகின்ற மண்ணில் ஒளிரும் கதிர்களையுடைய அழகிய மணிகளைப் பெறுகின்ற |
| அகன் கண் வைப்பின் நாடு கிழவோயே | அகன்ற இடத்தையுடைய ஊர்கள் நிறைந்த நாட்டின் உரிமையாளனே! |
| # 77 பாட்டு 77 | # 77 பாட்டு 77 |
| எனை பெரும் படையனோ சின போர் பொறையன் | எந்த அளவு பெரிய படையைக் கொண்டவன், சினத்துடன் போரிடும் இரும்பொறை? |
| என்றனிர் ஆயின் ஆறு செல் வம்பலீர் | என்று கேட்பீராகில், வழியே செல்லும் புதியவர்களே! |
| மன்பதை பெயர அரசு களத்து ஒழிய | உலகமக்கள் நிலைகுலைந்துபோக, அரசர்கள் போர்க்களத்தில் அழிந்துபோக |
| கொன்று தோள் ஓச்சிய வென்று ஆடு துணங்கை | அவரைக் கொன்று தோள்களை உயர்த்தி வெற்றி ஆட்டமான துணங்கைக்கூத்தாடிய |
| மீ பிணத்து உருண்ட தேயா ஆழியின் | பகைவரின் பிணத்தின் மீது உருண்டோடியும் தேய்ந்துபோகாத சக்கரங்களையுடைய |
| பண் அமை தேரும் மாவும் மாக்களும் | சிறப்பாகச் செய்யப்பட்ட தேரினையும், குதிரைகளையும், காலாட்படையினரையும் |
| எண்ணற்கு அருமையின் எண்ணின்றோ இலனே | எண்ணுவதற்கு அரிதாதலால் அவற்றை நான் எண்ணிக் கணக்கிடேன்; |
| கந்து கோள் ஈயாது காழ் பல முருக்கி | தறிகளில் கட்டிப்போட இடம்தராமல், தன்னை அடக்குவதற்குக் குத்தும் குத்துக்கோல்களை முறித்துப்போட்டு, |
| உகக்கும் பருந்தின் நிலத்து நிழல் சாடி | உயரப்பறக்க மேலெழும் பருந்தின் நிலத்தில் படியும் நிழலைப் பார்த்துச் சீறி, |
| சேண் பரல் முரம்பின் ஈர்ம் படை கொங்கர் | வெகு தொலைவுக்கு பரல்கற்களையுடைய மேட்டுநிலத்தில், வளைத்து இழுக்கும் தொறட்டிக் கம்பினையுடைய கொங்கர்களின் |
| ஆ பரந்து அன்ன செலவின் பல் | பசு மாடுகள் பரந்து செல்வதைப் போன்று நடந்துபோகின்ற, பலவான |
| யானை காண்பல் அவன் தானையானே | யானைகளைக் காண்கிறேன் அவனுடய சேனையில். |
| # 78 பாட்டு 78 | # 78 பாட்டு 78 |
| வலம் படு முரசின் இலங்குவன விழூஉம் | வெற்றி முழக்கமிடும் முரசினைப் போல, ஒளிர்வனவாய் விழுகின்ற |
| அம் வெள் அருவி உ வரையதுவே | அழகிய வெண்மையான அருவி அந்த எல்லையில் உள்ளது – |
| சில் வளை விறலி செல்குவை ஆயின் | சிலவான வளையல்களை அணிந்த விறலியே! அங்கு நீ செல்லவிரும்பினால், |
| வள் இதழ் தாமரை நெய்தலொடு அரிந்து | வளமையான இதழ்களையுடைய தாமரைப் பூவை நெய்தற்பூவோடு சேர்த்துக் கொய்துகொண்டு |
| மெல் இயல் மகளிர் ஒல்குவனர் இயலி | மென்மையான இயல்பினையுடைய மகளிர் அசைந்தசைந்து நடந்து |
| கிளி கடி மேவலர் புறவு-தொறும் நுவல | தினைக் கதிர்களில் வந்து படியும் கிளிகளை ஓட்டுவதற்கு விருப்பமுடையோராய், தினைப்புனங்கள்தோறும் குரலெழுப்ப, |
| பல் பயம் நிலைஇய கடறு உடை வைப்பின் | பலவகையான பயன்களும் நிலைபெற்ற காடுகளில் இருக்கும் ஊர்களையும், |
| வெல் போர் ஆடவர் மறம் புரிந்து காக்கும் | வெல்லுகின்ற போரையுடைய ஆடவர் வீர்ச் செயல்கள் புரிந்து காக்கின்ற |
| வில் பயில் இறும்பின் தகடூர் நூறி | விற்படையினர் நிறைந்த காவற்காட்டையுடைய தகடூரைத் தகர்த்து, |
| பேஎ மன்ற பிறழ நோக்கு இயவர் | கண்டார்க்கு அச்சத்தை உண்டாக்கும்படி பிறழ நோக்கும் பார்வையையும், பல இசைக்கருவிகளையுமுடைய பகைவரின், |
| ஓடு_உறு கடு முரண் துமிய சென்று | பிறரைத் தோற்று ஓடும்படியாகச் செய்யக்கூடிய கடும் பகைமை அழிந்துபோகச் சென்று |
| வெம் முனை தபுத்த_காலை தம் நாட்டு | அவரின் கொடிய போர்முனையை அழித்த போது, அவருடைய நாட்டில் |
| யாடு பரந்து அன்ன மாவின் | ஆடுகள் சிதறிப் பரந்து செல்வதைப் போன்ற குதிரைகளையும், |
| ஆ பரந்து அன்ன யானையோன் குன்றே | பசுக்களும் சிதறுண்டு பரந்து செல்வதைப் போன்ற யானைகளையும் உடையவனின் குன்று – |
| # 79 பாட்டு 79 | # 79 பாட்டு 79 |
| உயிர் போற்றலையே செருவத்தானே | உயிரை ஒரு பொருட்டாக எண்ணியதில்லை, போர்க்களத்தில்; |
| கொடை போற்றலையே இரவலர் நடுவண் | கொடுக்கின்ற பொருள்களின் அளவை ஒரு பொருட்டாக எண்ணியதில்லை, இரவலர்களின் நடுவில்; |
| பெரியோர் பேணி சிறியோரை அளித்தி | பெரியோரைப் பேணிக்காத்துச் சிறியோருக்கும் அருள் செய்கின்றாய்! |
| நின்_வயின் பிரிந்த நல் இசை கனவினும் | உன்னிடமிருந்து புறப்பட்டுச் சென்ற உனது நல்ல புகழ், கனவிலும் |
| பிறர் நசை அறியா வயங்கு செம் நாவின் | வேறு யாரையும் விரும்பிச் செல்லுதலை அறியமாட்டாது! தெளிவான பேச்சைக்கொண்ட செம்மையான நாவினையும், |
| படியோர் தேய்த்த ஆண்மை தொடியோர் | படிந்துவராதவரை முற்றிலும் அழிக்கின்ற ஆண்மையையும், தோள்வளை அணிந்த மகளிரின் |
| தோள் இடை குழைந்த கோதை மார்ப | தோள்களின் இடையே குழைந்துபோன மாலையையுடைய மார்பினையும் கொண்ட வேந்தனே! |
| அனைய அளப்பு அரும்-குரையை அதனால் | அத்தன்மைகளில் அளத்தற்கரியவனாய் இருக்கிறாய்! அதனால் |
| நின்னொடு வாரார் தம் நிலத்து ஒழிந்து | உன் விருப்பப்படி நடப்பதற்கு இசையாமல், தங்கள் நாட்டிலேயே இருந்து, |
| கொல் களிற்று யானை எருத்தம் புல்லென | அவர் ஏறிவருகின்ற கொல்லுகின்ற ஆண்யானையின் பிடரி புல்லென்று வெற்றிடம் ஆகும்படியாக, |
| வில் குலை அறுத்து கோலின் வாரா | அதன் மீது வருவோரின் வில்லின் நாணை அறுத்து அவரை வீழ்த்தி, தனது செங்கோலுக்கு அடங்கிவராத |
| வெல் போர் வேந்தர் முரசு கண் போழ்ந்து அவர் | வெல்லும் போரினைக் கொண்ட வேந்தர்களின் முரசுகளின் முகப்பைக் கிழித்து, அவருடைய |
| அரசு உவா அழைப்ப கோடு அறுத்து இயற்றிய | பட்டத்து யானை கதறக்கதற அதனுடைய கொம்புகளை அறுத்தெடுத்துச் செய்த |
| அணங்கு உடை மரபின் கட்டில் மேல் இருந்து | அச்சம் தரும் தன்மையையுடைய கட்டிலின் மேலிருந்து |
| தும்பை சான்ற மெய் தயங்கு உயக்கத்து | தும்பைப் போரின் தன்மை பொருந்திய போரைச் செய்ததால் உடல் சோர்வினில் ஓய்ந்திருக்க, |
| நிறம் படு குருதி புறம்படின் அல்லது | மார்பினைக் கிழித்து வரும் குருதி மேலே பட்டாலல்லது |
| மடை எதிர்கொள்ளா அஞ்சுவரு மரபின் | பலியுணவை ஏற்றுக்கொள்ளாத அச்சம்தரும் இயல்பினையுடைய |
| கடவுள் அயிரையின் நிலைஇ | கடவுளான கொற்றவை இருக்கும் அயிரை மலையைப் போல நிலைபெற்று |
| கேடு இல ஆக பெரும நின் புகழே | அழியாதது ஆகுக பெருமானே! உன் புகழ்! |
| # 80 பாட்டு 80 | # 80 பாட்டு 80 |
| வான் மருப்பின் களிற்று யானை | – வெண்மையான கொம்புகளைக் கொண்ட போர்யானைகள் |
| மா மலையின் கணம்_கொண்டு அவர் | பெரிய மலை போலக் கூட்டமாய் நிற்க, அவர்கள் |
| எடுத்து எறிந்த விறல் முரசம் | தூக்கிவைத்து முழக்கிய வெற்றி முரசம் |
| கார் மழையின் கடிது முழங்க | கார்கால மேகங்கள் போல் மிக அதிகமாக முழங்க, |
| சாந்து புலர்ந்த வியல் மார்பின் | பூசிய சந்தனம் புலர்ந்துபோன அகன்ற மார்பினையும், |
| தொடி சுடர் வரும் வலி முன்கை | தோள்வளை ஒளிவிட்டுப் பிரகாசிக்கும் வலிமை மிக்க முன்கையினையும், |
| புண் உடை எறுழ் தோள் புடையல் அம் கழல் கால் | விழுப்புண் பட்ட வலிமையான தோள்களில் மாலையையும், அழகிய கழலணிந்த கால்களையும், |
| பிறக்கு அடி ஒதுங்கா பூட்கை ஒள் வாள் | காலைப் பின்னெடுத்து வைக்காத கோட்பாட்டையுடைய ஒளிரும் வாட்படையினையும் உடைய |
| ஒடிவு இல் தெவ்வர் எதிர் நின்று உரைஇ | வணங்காத பகைவர் முன்னே அவருக்கு எதிரே நின்று, இரண்டு பக்கங்களிலும் உலாவி, |
| இடுக திறையே புரவு எதிர்ந்தோற்கு என | “செலுத்துவீராக திறையை, உமக்குப் பாதுகாப்பினை வழங்குவதற்காக வந்திருப்பவருக்கு” என்று |
| அம்பு உடை வலத்தர் உயர்ந்தோர் பரவ | வலக்கையில் அம்பினை உடைய வீரர்கள் புகழ்ந்து கூற, |
| அனையை ஆகன் மாறே பகைவர் | நீயும் அப்படிப்பட்டவன் ஆதலினாலே, உன் பகைவரின் |
| கால் கிளர்ந்து அன்ன கதழ் பரி புரவி | காற்று மேலெழுந்ததைப் போன்ற விரைவான ஓட்டத்தையுடைய குதிரைகள் பூட்டிய |
| கடும் பரி நெடும் தேர் மீமிசை நுடங்கு கொடி | வேகமாகச் செல்லும் நெடிய தேர் மீது கட்டிய அசைந்தாடும் கொடி |
| புல வரை தோன்றல் யாவது சின போர் | அவரது நாட்டின் எல்லையில் தோன்றுவது எவ்வாறு? சினங்கொண்ட போரினையும் |
| நிலவரை நிறீஇய நல் இசை | நிலத்தின் எல்லைவரை நிறுவிய நல்ல புகழினையும் |
| தொலையா கற்ப நின் தெம் முனையானே | கேடில்லாத கல்வியினையும் உடையவனே! நீ பகைகொண்ட போர் முனையில் – |
| ஒன்பதாம் பத்து | ஒன்பதாம் பத்து |
| பெருங்குன்றூர்க் கிழார் | பெருங்குன்றூர்க் கிழார் |
| # 81 பாட்டு 81 | # 81 பாட்டு 81 |
| உலகம் புரக்கும் உரு கெழு சிறப்பின் | உலகத்து உயிர்களைக் காக்கும், அச்சம் தரக்கூடிய சிறப்பினையுடைய |
| வண்ண கருவிய வளம் கெழு கமம் சூல் | கரிய நிறத்துடன் தொகுதியாய் இருக்கும் வளம் பொருந்திய நிறைந்த நீரையுடைய மழைமேகங்கள், |
| அகல் இரு விசும்பின் அதிர் சினம் சிறந்து | அகன்ற கரிய வானத்தில் அதிரும்படி மின்னிக் குமுறி, |
| கடும் சிலை கழறி விசும்பு அடையூ நிவந்து | மிக்க முழக்கத்தை எழுப்பி, வானத்தையே அடைத்துக்கொண்டு உயர்ந்தெழுந்து, |
| காலை இசைக்கும் பொழுதொடு புலம்பு கொள | கார்காலத்தை அறிவிக்கும் பருவத்தால் உயிர்கள் வருத்தம் கொள்ள, |
| களிறு பாய்ந்து இயல கடு மா தாங்க | களிறுகள் பாசறையில் விரைவாக அங்குமிங்கும் நடந்து திரிய, விரைந்து செல்லும் குதிரைகள் கட்டுப்பாட்டுடன் நடக்க, |
| ஒளிறு கொடி நுடங்க தேர் திரிந்து கொட்ப | ஒளிவீசும் கொடிகள் அசைந்தசைந்து ஆடிக்கொண்டிருக்க, தேர்கள் அங்குமிங்கும் சுற்றிக்கொண்டு சுழன்றுவர, |
| அரசு புறத்து இறுப்பினும் அதிர்வு இலர் திரிந்து | பகையரசர் சுற்றிலும் முற்றுகையிட்டுத் தங்கியிருந்தாலும், சிறிதும் நடுக்கமில்லாதவராய் நடமாடிக்கொண்டு |
| வாயில் கொள்ளா மைந்தினர் வயவர் | தமக்குக் கொடுக்கப்பட்ட இடங்களைக் காவல் காக்காத வன்மையினராகிய வீரர்கள் |
| மா இரும் கங்குலும் விழு தொடி சுடர்வர | பெரும் இருள் நிறைந்த இரவுநேரத்திலும் தம் தோளின் வீரவளை ஒளிவீசத் |
| தோள் பிணி மீகையர் புகல் சிறந்து நாளும் | தம் கைகளால் தோள்களை மாறி மாறிப் பிடித்துக்கொண்டவராய், போர் மீது பெரு விருப்பம் கொண்டு, ஒவ்வொரு நாளும் |
| முடிதல் வேட்கையர் நெடிய மொழியூஉ | போரில் தம் வாழ்க்கையை முடித்துக்கொள்ளும் வேட்கையினை உடையவராய், வஞ்சினம் கூறி |
| கெடாஅ நல் இசை தம் குடி நிறும்-மார் | கெடாத நல்ல புகழையுடைய தம் குடியின் சிறப்பை நிலைநிறுத்துவதற்கு, |
| இடாஅ ஏணி வியல் அறை கொட்ப | அளவிடப்படாத எல்லையைக் கொண்ட அகன்ற பாசறையில் சுழன்று திரிய, |
| நாடு அடிப்படுத்தலின் கொள்ளை மாற்றி | பகைவர் நாட்டை வென்று கீழ்ப்படுத்தியதால் அந் நாட்டில் கொள்ளவேண்டியவற்றைக் கொள்ளாமல் விட்டு |
| அழல் வினை அமைந்த நிழல் விடு கட்டி | நெருப்பிலிட்டு உருக்கி உருவாக்கிய ஒளிவிடும் தங்கக் கட்டிகளை, |
| கட்டளை வலிப்ப நின் தானை உதவி | இன்னின்னாருக்கு இன்னளவு தரவேண்டும் என்று நிச்சயிக்கப்பட்டவாறு, உன் படைவீரருக்கு உதவி, |
| வேறு புலத்து இறுத்த வெல் போர் அண்ணல் | வேற்று நாடுகளில் வேண்டுமளவு தங்கிய வெல்லுகின்ற போரையுடைய அண்ணலே! |
| முழவின் அமைந்த பெரும் பழம் மிசைந்து | முழவைப் போன்று அமைந்த பெரிய பலாப்பழத்தை உண்டு, |
| சாறு அயர்ந்து அன்ன கார் அணி யாணர் | விழாக் கொண்டாடும் காலத்தில் குடிப்பதைப் போன்று, கரிய, அழகிய புதுமையினை உடைய |
| தூம்பு அகம் பழுனிய தீம் பிழி மாந்தி | மூங்கில் குழாயினுள்ளே முதிர்வடைந்த இனிய கள்ளினை நிறைய அருந்தி, |
| காந்தள் அம் கண்ணி செழும் குடி செல்வர் | காந்தள் பூ மாலையைத் தலையில் சூடிய, செழித்த குடியினைச் சேர்ந்த செல்வர்கள் |
| கலி மகிழ் மேவலர் இரவலர்க்கு ஈயும் | ஆரவாரத்தையுடைய மகிழ்ச்சியை விரும்பியவராய், இரப்போர்க்கு அள்ளிக்கொடுக்கும், |
| சுரும்பு ஆர் சோலை பெரும் பெயல் கொல்லி | வண்டுகள் ஆரவாரிக்கும் சோலைகள் சூழ்ந்த பெரும் புகழையுடைய கொல்லி மலையில் உண்டாகிய |
| பெரு_வாய்_மலரொடு பசும்பிடி மகிழ்ந்து | இருவாட்சிப் பூக்களோடு, பச்சிலையைத் தொடுத்து அணிந்து, |
| மின் உமிழ்ந்து அன்ன சுடர் இழை ஆயத்து | மின்னல் வெட்டியதைப் போன்ற ஒளிவிடும் அணிகலன்களை அணிந்த ஆயமகளிர் சூழ்ந்திருக்க, |
| தன் நிறம் கரந்த வண்டு படு கதுப்பின் | தனது நிறத்தையே மறைக்குமளவுக்கு வண்டுகள் மொய்க்கும் கூந்தலையுடைய, |
| ஒடுங்கு ஈர் ஓதி ஒண்_நுதல் அணி கொள | சுருண்டிருக்கும் முன்மயிர் தவழும் ஒளி பொருந்திய நெற்றியும் அழகு பெறும்படியான |
| கொடும் குழைக்கு அமர்த்த நோக்கின் நயவர | வளைந்த காதணியுடன் போட்டிபோடும் பார்வையினையும், இன்பம் வரும்படி |
| பெருந்தகைக்கு அமர்ந்த மென் சொல் திரு முகத்து | தன் பெருங்குணங்களுக்கு ஏற்பப் பேசும் மென்மையான சொற்களையும், அழகிய முகத்தையும், |
| மாண் இழை அரிவை காணிய ஒரு நாள் | மிகச் சிறந்த அணிகலன்களையும் உடைய உன் தேவியைக் காண்பதற்கு ஒரு நாள் |
| பூண்க மாள நின் புரவி நெடும் தேர் | பூட்டுக! உன் புரவிகளையுடைய நெடிய தேரினை! |
| முனை கைவிட்டு முன்னிலை செல்லாது | போரைக் கைவிட்டு உன் முன்னே வணங்கி நில்லாமல் |
| தூ எதிர்ந்து பெறாஅ தா இல் மள்ளரொடு | உன் வலிமையினை எதிர்த்து நிற்கமுடியாத வன்மை இல்லாத வீரரோடு |
| தொன் மருங்கு அறுத்தல் அஞ்சி அரண் கொண்டு | அவரின் பழமையான குலத்தை நீ வேரறுப்பாய் என்று அஞ்சி, அரண்களுக்குள் பதுங்கிக்கொண்டு |
| துஞ்சா வேந்தரும் துஞ்சுக | தூங்காமல் இருக்கும் வேந்தர்களும் கொஞ்சம் தூங்கிக்கொள்ளட்டும்; |
| விருந்தும் ஆக நின் பெரும் தோட்கே | உன் தேவியைத் தழுவும் விருந்தும் கிடைக்கட்டும் உன் பெரிய தோள்களுக்கு. |
| # 82 பாட்டு 82 | # 82 பாட்டு 82 |
| பகை பெருமையின் தெய்வம் செப்ப | உன்னுடைய பகைமை பெரிதாகையால், உன் பகைவர் தெய்வத்தை வழிபட, |
| ஆர் இறை அஞ்சா வெருவரு கட்டூர் | இனிதாகத் தங்குவதற்கு அரிதான இருப்பிடமாயினும் வீரர்கள் அஞ்சாத, பகைவர்க்கு அச்சந்தரக்கூடிய பாசறையில், |
| பல் கொடி நுடங்கும் முன்பின் செறுநர் | பல வகைக் கொடிகள் அசைந்தாடும் வலிமையினையுடைய பகைவரின் |
| செல் சமம் தொலைத்த வினை நவில் யானை | படையெடுத்துச் சென்று போரிடும் போர்களை அழித்த போர்த்தொழிலில் நன்கு பயிற்சிபெற்ற யானைகள், |
| கடாஅம் வார்ந்து கடும் சினம் பொத்தி | மதநீர் பொழிந்து மிகுந்த சினக் கொண்டு |
| வண்டு படு சென்னிய பிடி புணர்ந்து இயல | வண்டுகள் மொய்க்கும் தலையினையுடையவாய், பெண்யானைகளைச் சேர்ந்து திரிய |
| மறவர் மறல மா படை உறுப்ப | வீரர்கள் போர்வெறிகொண்டு திரிய, குதிரைகள் போர்க் கவசங்கள் பூண்டு இருக்க, |
| தேர் கொடி நுடங்க தோல் புடை ஆர்ப்ப | தேரின்மீது கொடிகள் அசைந்தாட, கேடகப் படைகள் ஒருபக்கத்தில் ஆரவாரிக்க, |
| காடு கை_காய்த்திய நீடு நாள் இருக்கை | காட்டு மரங்களை வெட்டிக் குளிர்காய்ந்த நீண்ட நாட்களாக இருக்கின்ற பாசறை இருப்பில் |
| இன்ன வைகல் பல் நாள் ஆக | இப்படியாகத் தங்குதல் பல நாள்களாக இருக்க, |
| பாடி காண்கு வந்திசின் பெரும | – பாடிக் காண்பதற்கு வந்திருக்கிறேன், பெருமானே! |
| பாடுநர் கொள_கொள குறையா செல்வத்து செற்றோர் | பாடி வருவோர் பெற்றுக்கொண்டே இருந்தாலும் குறையாத செல்வத்தையும், பகைவர் |
| கொல_கொல குறையா தானை சான்றோர் | கொன்றுகொண்டே இருந்தாலும் குறையாத சேனையையும், சான்றோரானவர் |
| வண்மையும் செம்மையும் சால்பும் மறனும் | உனது கொடை, செங்கோன்மை, நற்பண்புகள், வீரம் ஆகிய இவற்றை |
| புகன்று புகழ்ந்து அசையா நல் இசை | விரும்பிப் புகழ்வதால் கிடைக்கும் குன்றாத நல்ல புகழையும் |
| நிலம்தருதிருவின்நெடியோய் நின்னே | மாற்றார் நிலத்தைப் போரிட்டுச் சேர்த்துக்கொள்ளும் செல்வத்தையும் உடைய நெடியவனான சேரமானே, உன்னை – |
| # 83 பாட்டு 83 | # 83 பாட்டு 83 |
| கார் மழை முன்பின் கைபரிந்து எழுதரும் | கரிய மேகங்களுக்கு முன்பாக, ஒழுங்கு குலைந்து எழுகின்ற |
| வான் பறை குருகின் நெடு வரி பொற்ப | வெண்மையான சிறகுகளைக் கொண்ட கொக்குகள் பின்பு நீண்ட வரிசையாய்ச் செல்வதைப் போன்ற |
| கொல் களிறு மிடைந்த பல் தோல் தொழுதியொடு | கொல்லுகின்ற யானைப்படைகளினூடே செறிந்து கலந்த பலவான கேடகப் படையுடன் |
| நெடும் தேர் நுடங்கு கொடி அவிர்வர பொலிந்து | நெடிய தேரின் மீது அசைந்தாடும் கொடி ஒளிவீசிப் பறக்க, அழகுபட |
| செலவு பெரிது இனிது நின் காணுமோர்க்கே | படையெடுத்துச் செல்வது பெரிதும் இன்பம் தருவதாகும் உன்னைக் காணுவோர்க்கு; |
| இன்னாது அம்ம அது தானே பன் மா | – துன்பத்தைத் தருகிறது அதுவே! பலபடியாக |
| நாடு கெட எருக்கி நன் கலம் தரூஉம் நின் | பகைவரின் நாடுகள் கெட்டழிய, திறையாக நல்ல அணிகலன்களைக் கொண்டுவருகின்ற உன் |
| போர் அரும் கடும் சினம் எதிர்ந்து | போரிடுவதற்கு அரிய கடுமையான சினத்தை எதிர்கொண்டு |
| மாறு கொள் வேந்தர் பாசறையோர்க்கே | பகைமை கொண்ட வேந்தரின் பாசறையில் உள்ளவர்க்கெல்லாம் – |
| # 84 பாட்டு 84 | # 84 பாட்டு 84 |
| எடுத்தேறு ஏய கடி புடை அதிரும் | போர்க்களத்தில் வீரரை முன்னேறிச் செல்ல ஏவுகின்ற வகையில் குறுந்தடியால் புடைக்கப்பட்டு அதிர்கின்ற |
| போர்ப்பு_உறு முரசம் கண் அதிர்ந்து ஆங்கு | தோலால் போர்த்தப்பட்ட முரசின் முகப்பு அதிர்வதைப் போன்ற |
| கார் மழை முழக்கினும் வெளில் பிணி நீவி | கார்காலத்து மேகங்களின் முழக்கத்தைக் கேட்டாலும், கட்டிவைக்கப்பட்டிருக்கும் தறியின் பிணிப்பினை அறுத்துக்கொண்டு |
| நுதல் அணந்து எழுதரும் தொழில் நவில் யானை | நெற்றியை மேலே தூக்கி அண்ணாந்து பார்த்து நடக்கத்தொடங்கும் போர்த்தொழிலில் நல்ல பயிற்சியையுடைய யானைப்படை |
| பார்வல் பாசறை தரூஉம் பல் வேல் | கண்காணிப்புக் கூடாரத்துக்கு வந்து சேருகின்ற, பல வேற்படையினைக் கொண்ட |
| பூழியர் கோவே பொலம் தேர் பொறைய | பூழிநாட்டவர்க்கு வேந்தனே! பொன்தகட்டால் மூடிய தேரினையுடைய சேரமானே! |
| மன்பதை சவட்டும் கூற்ற முன்ப | மக்களைப் பெரிதாய்த் துன்புறுத்தும் கூற்றுவனைப் போன்ற வலிமையுடையவனே! |
| கொடி நுடங்கு ஆர் எயில் எண்ணு வரம்பு அறியா | உன் பகைவரின் கொடிகள் அசைந்தாடும் வெல்வதற்கு அரிய மதில்களைக் கணக்கிட்டால் எண்ணிமுடியாது; |
| பல் மா பரந்த புலம் ஒன்று என்று எண்ணாது | பலவான குதிரைகளும் யானைகளும் பரந்திருக்கின்றன; எனினும் உன்னுடைய நாட்டைக் கொள்வது எளிய செயல் என்று எண்ணாமல் |
| வலியை ஆதல் நற்கு அறிந்தனர் ஆயினும் | நீ மிக்க வலிமையுடையவன் என்பதனை நன்கு அறிந்திருக்கின்றனர் உன் பகைவர்; ஆயினும் |
| வார் முகில் முழக்கின் மழ களிறு மிகீஇ தன் | நீண்ட மேகத்தின் முழக்கம் போல இளமையான களிறுகள் பிளிறிக்கொண்டு செருக்குடன் வர, தன் |
| கால் முளை மூங்கில் கவர் கிளை போல | காலில் அகப்பட்ட முளையாகிய மூங்கிலின் கவர்த்த கிளையைப் போல, |
| உய்தல் யாவது நின் உடற்றியோரே | தப்பிப்பிழைப்பது எவ்வாறு உன்னைச் சினமூட்டியவர்கள்? – |
| வணங்கல் அறியார் உடன்று எழுந்து உரைஇ | உன்னை வணங்கி வாழ்தலை அறியமாட்டார் – சினந்தெழுந்து உன் முன் வந்து |
| போர்ப்பு_உறு தண்ணுமை ஆர்ப்பு எழுந்து நுவல | தோலால் போர்க்கப்பட்ட தண்ணுமையின் மிகுந்த ஓசை எழுந்து போரைத் தெரிவிக்க, |
| நோய் தொழில் மலைந்த வேல் ஈண்டு அழுவத்து | உயிர்களுக்குத் துன்பத்தைச் செய்யும் போர்த்தொழிலை மேற்கொண்ட வேற்படை செறிந்திருக்கும் போர்க்களத்தில் |
| முனை புகல் புகல்வின் மாறா மைந்தரொடு | போரை விரும்பும் விருப்பத்தில் மாறா வீரருடன், |
| உரும் எறி வரையின் களிறு நிலம் சேர | இடி வீழ்ந்த மலை போல களிறுகள் கொலையுண்டு நிலத்தில் விழ, |
| காஞ்சி சான்ற செரு பல செய்து நின் | நிலையாமை உணர்வே நிறைந்த போர்கள் பலவற்றைச் செய்த உன் |
| குவவு குரை இருக்கை இனிது கண்டிகுமே | – திரண்ட ஆரவாரத்தையுடைய உன் படைகளின் இருப்பை இனிதே கண்டுமகிழ்ந்தோம், |
| காலை மாரி பெய்து தொழில் ஆற்றி | உரிய காலத்தில் மழை பெய்து உழவுத்தொழில் நடக்கச்செய்து |
| விண்டு முன்னிய புயல் நெடும் காலை | மலையுச்சியை நோக்கிச் சென்ற மேகங்கள், நீண்ட நேரங் கழித்து, |
| கல் சேர்பு மா மழை தலைஇ | மலையை அடைந்து மிகுந்த மழையைப் பெய்யத்தொடங்கியதால் |
| பல் குரல் புள்ளின் ஒலி எழுந்து ஆங்கே | பல குரல்களையுடைய பறவைகளின் ஒலி எழுந்ததைப் போன்ற – |
| # 85 பாட்டு 85 | # 85 பாட்டு 85 |
| நன் மரம் துவன்றிய நாடு பல தரீஇ | நல்ல மரங்கள் செறிந்து வளர்ந்த நாடுகள் பலவற்றை வென்றெடுத்து, |
| பொன் அவிர் புனை செயல் இலங்கும் பெரும் பூண் | ஒளிவிடும் பொன்னால் செய்த அழகிய வேலைப்படுள்ள பளிச்சிடும் பெரிய அணிகலன்களைக் கொண்ட, |
| ஒன்னா பூட்கை சென்னியர் பெருமான் | எம்மோடு ஒன்றிவராத கொள்கையையுடைய சோழர்களின் வேந்தனை |
| இட்ட வெள் வேல் முத்தை தம் என | என் முன்னே கொண்டுவருவீராக என்ற சொல் கேட்டவுடன், சோழரின் படைவீரர் கீழே எறிந்த வெண்மையான வேல், |
| முன் திணை முதல்வர் போல நின்று | உன் முன்னிருந்த உன் குலத்து முன்னோர்களைப் போல நிலைபெற்றிருந்து, |
| தீம் சுனை நிலைஇய திரு மா மருங்கின் | இனிய நீரினையுடைய சுனைகள் வற்றாமல் இருக்கும், மலைவளம் பெருகிய பக்கங்களைக் கொண்ட, |
| கோடு பல விரிந்த நாடு காண் நெடு வரை | சிகரங்கள் பல பரவலாய் இருக்கும், ஏறி நின்று பார்த்தால் நாடு முழுவதும் தெரியுமளவுக்கு உயரமான நீண்ட மலையில் உள்ள |
| சூடா நறவின் நாள்_மகிழ் இருக்கை | சூடிக்கொள்ளாத நறவு ஆகிய நறவு என்னும் ஊரில் நாள்காலத்துக்குரிய கொலுவிருக்கையில், |
| அரசவை பணிய அறம் புரிந்து வயங்கிய | அவையிலுள்ளோர் பணிந்து நிற்க, அறத்தை விரும்பிச் செய்து புகழ்பெற்ற, |
| மறம் புரி கொள்கை வயங்கு செம் நாவின் | வீரத்தையும் விரும்புகின்ற உன் கொள்கையினை, தெளிந்த பேச்சினையுடைய செம்மையான நாவினையும், |
| உவலை கூரா கவலை இல் நெஞ்சின் | சிறுமைகூராத கவலை அற்ற நெஞ்சினையும், |
| நனவில் பாடிய நல் இசை | மெய்யாகவே புகழ்ந்து பாடிய நல்ல புகழையும் கொண்ட |
| கபிலன் பெற்ற ஊரினும் பலவே | கபிலன் பெற்ற ஊரின் எண்ணிக்கையைக் காட்டிலும் மிகப் பலவாகும். |
| # 86 பாட்டு 86 | # 86 பாட்டு 86 |
| உறல் உறு குருதி செரு_களம் புலவ | கொட்டிப்படிந்த குருதியால் போர்க்களம் புலால்நாற்றம் வீச, |
| கொன்று அமர் கடந்த வெம் திறல் தட கை | பகைவரைக் கொன்று போரில் வென்ற மிகுந்த திறம் பொருந்திய பெரிய கையையும், |
| வென் வேல் பொறையன் என்றலின் வெருவர | வெற்றியையுடைய வேலினையும் கொண்ட பொறையன் என்று எல்லாரும் சொல்லுவதால், உள்ளம் அஞ்சும்படியான |
| வெப்பு உடை ஆடூஉ செத்தனென்-மன் யான் | கடுமை மிகுந்த ஆண்மகன் என்று கருதிக்கொண்டிருந்தேன் நான்; |
| நல் இசை நிலைஇய நனம் தலை உலகத்து | நல்ல புகழை நிலைநிறுத்தும்பொருட்டு, அகன்ற இடத்தையுடைய உலகத்தில் |
| இல்லோர் புன்கண் தீர நல்கும் | பொருளில்லாதவரின் துன்பம் நீங்குமாறு அள்ளிக்கொடுக்கும் |
| நாடல் சான்ற நயன் உடை நெஞ்சின் | அறத்தின் மீதான நாட்டம் மிகுந்த அன்புடைய நெஞ்சினையும், |
| பாடுநர் புரவலன் ஆடு நடை அண்ணல் | பாடிவரும் பாணர், புலவர் ஆகியோரின் பாதுகாவலன் இந்த அசைந்த நடையையுடைய அண்ணல், |
| கழை நிலை பெறாஅ குட்டத்து ஆயினும் | ஓடக்கோல் ஊன்ற முடியாத அளவுக்கு ஆழமானது என்றாலும், |
| புனல் பாய் மகளிர் ஆட ஒழிந்த | அந்த நீரில் பாய்ந்து மகளிர் நீர்விளையாட்டு ஆட, அவர் காதிலிருந்தி விழுந்த |
| பொன் செய் பூம் குழை மீமிசை தோன்றும் | பொன்னாற் செய்த அழகிய குழையானது மேலே நன்றாகத் தெரியும் |
| சாந்து வரு வானின் நீரினும் | சந்தன மரங்கள் மிதந்து வரும் வானியாற்றின் நீரைக் காட்டிலும் |
| தீம் தண் சாயலன் மன்ற தானே | இனிய குளிர்ந்த இயல்பினன், உறுதியாக. |
| # 87 பாட்டு 87 | # 87 பாட்டு 87 |
| சென்மோ பாடினி நன் கலம் பெறுகுவை | செல்வாயாக பாடினியே! நல்ல அணிகலன்களைப் பெறுவாய்! |
| சந்தம் பூழிலொடு பொங்கு நுரை சுமந்து | சந்தனம், அகில் ஆகியவற்றின் கட்டைகளோடு பொங்குகின்ற நுரையையும் சுமந்துகொண்டு, |
| தெண் கடல் முன்னிய வெண் தலை செம் புனல் | தெளிந்த கடலை நோக்கிச் செல்லும், நுரையால் வெண்மையான தலையைக் கொண்ட சிவந்த புதுவெள்ளம் |
| ஒய்யும் நீர் வழி கரும்பினும் | இழுத்துக்கொண்டுவரும் நீர்மேல் மிதந்து வரும் வேழக் கரும்பைக் காட்டிலும் |
| பல் வேல் பொறையன் வல்லனால் அளியே | பல வேற்படையினைக் கொண்ட பொறையன் வல்லவன் துணைபுரிவதில். |
| # 88 பாட்டு 88 | # 88 பாட்டு 88 |
| வையகம் மலர்ந்த தொழில் முறை ஒழியாது | உலகம் சிறப்பதற்கான தொழில்முறையில் வழுவாமல் இருந்து, |
| கடவுள் பெயரிய கானமொடு கல் உயர்ந்து | விந்தை என்னும் கொற்றவையின் பெயரைக் கொண்ட விந்தாடவி என்ற காட்டோடு இருக்கும் விந்திய மலை உயர்ந்து நிற்க, |
| தெண் கடல் வளைஇய மலர் தலை உலகத்து | தெளிந்த கடல் சூழ்ந்திருக்கும் அகன்ற இடத்தையுடைய உலகத்தில், |
| தம் பெயர் போகிய ஒன்னார் தேய | தங்கள் புகழை எங்கும் பரப்பிய பகைவராகிய கடம்பர்கள் தம் நிலையில் தாழ்வுற, |
| துளங்கு இரும் குட்டம் தொலைய வேல் இட்டு | அசைவாடும் அலைகளைக் கொண்ட பெரிய கடலை அரணாகக் கொண்ட நிலை அழியுமாறு வேற்படையைச் செலுத்தி வென்று |
| அணங்கு உடை கடம்பின் முழு_முதல் தடிந்து | தெய்வத்தன்மை பொருந்திய அவர்களின் காவல்மரமான கடம்பமரத்தை அடியோடு வெட்டிச் சாய்த்து, |
| பொரு முரண் எய்திய கழுவுள் புறம்பெற்று | போரிடும் பகைமை கொண்ட கழுவுள் என்பானைப் புறமுதுகிடச் செய்து, |
| நாம மன்னர் துணிய நூறி | அவனுக்குத் துணையாய் வந்த அச்சந்தரக்கூடிய மன்னர்களைத் துண்டுதுண்டாக வெட்டிச் சாய்த்து, |
| கால் வல் புரவி அண்டர் ஓட்டி | வலிமையான கால்களை உடைய குதிரைகளைக் கொண்ட அண்டர் என்னும் இடையர்களை விரட்டி, |
| சுடர் வீ வாகை நன்னன் தேய்த்து | ஒளிவிடும் பூவான வாகையினைச் சூடிய நன்னனை அழித்து, |
| குருதி விதிர்த்த குவவு சோற்று குன்றோடு | இரத்தம் கலந்து குவிக்கப்பட்டிருக்கும் குன்று போன்ற சோற்றுக் குவியலுடன் |
| உரு கெழு மரபின் அயிரை பரைஇ | அச்சந்தரும் இயல்புடைய அயிரை மலையிலுள்ள கொற்றவையைப் போற்றிப்பாடி, |
| வேந்தரும் வேளிரும் பின்வந்து பணிய | முடியுடை வேந்தரும், குறுநில மன்னரும் பின்னால் நின்று பணிந்துகொள்ள, |
| கொற்றம் எய்திய பெரியோர் மருக | வெற்றி எய்திய பெருமக்களின் வழிவந்தவனே! |
| வியல் உளை அரிமான் மறம் கெழு குருசில் | அகன்ற பிடரிமயிரினை உடைய சிங்கம் போன்ற வீரம் பொருந்திய குருசிலே! |
| விரவு பணை முழங்கு நிரை தோல் வரைப்பின் | பலவகையான முரசுகள் முழங்குகின்ற, வரிசையாகத் தோலாலான கேடயங்கள் பரப்பிய இடத்தையுடைய, |
| உரவு களிற்று வெல் கொடி நுடங்கும் பாசறை | வலிமையான களிறுகளின் மேல் வெற்றிக் கொடிகள் அசைந்தாடும் பாசறையில், |
| ஆர் எயில் அலைத்த கல் கால் கவணை | பகைவரின் அரிய மதிலைச் சீர்குலைத்த கற்களை வீசியெறியும் கவணைப் பொறியையும், |
| நார் அரி நறவின் கொங்கர் கோவே | நார்க்கூடையால் வடிக்கப்பட்ட கள்ளையும் உடைய கொங்குநாட்டவர் அரசனே! |
| உடலுநர் தபுத்த பொலம் தேர் குருசில் | உன்மேல் சினங்கொண்டவரைக் கொன்றழித்த, பொன்தகடால் வேய்ந்த தேரினை உடைய குருசிலே! |
| வளை கடல் முழவின் தொண்டியோர் பொருந | சங்குகளையுடைய கடலின் முழக்கத்தைப் போன்ற முழவினையுடைய, தொண்டி நகரத்தார்க்குத் தலைவனே! |
| நீ நீடு வாழிய பெரும நின்_வயின் | நீ நீண்ட காலம் வாழ்வாயாக பெருமானே! உன்னை நோக்கி வரும் – |
| துவைத்த தும்பை நனவு_உற்று வினவும் | பல வாத்தியங்கள் முழங்குகின்ற, தும்பைப்பூ சூடிக்கொண்டு செய்யும் போரில், மெய்யான வெற்றியை வேண்டிக்கொண்டு |
| மாற்று அரும் தெய்வத்து கூட்டம் முன்னிய | மாற்றுதற்கு அரிய தெய்வங்கள் கூடியிருக்கும் அயிரை மலையில் தோன்றிய |
| புனல் மலி பேரியாறு இழிதந்து ஆங்கு | நீர் நிறைந்த பேரியாறு இறங்கி வந்ததைப் போன்று – |
| வருநர் வரையா செழும் பல் தாரம் | – பெருங்கூட்டமான இரவலருக்கும் – வரையாது வழங்கும் செழுமையான, பலவாகிய செல்வம், |
| கொள_கொள குறையாது தலைத்தலை சிறப்ப | அந்த இரவலர் வாங்கிக்கொண்டேயிருக்கவும் குறைந்துபோகாமல் மேலும் மேலும் மிகுந்திருக்க, |
| ஓவத்து அன்ன உரு கெழு நெடு நகர் | ஓவியத்தில் வரைந்தாற் போன்ற உருவம் பொருந்திய நெடிய அரண்மனையில் |
| பாவை அன்ன மகளிர் நாப்பண் | கொல்லிப்பாவை போன்ற அழகிய மகளிர் நடுவில் – |
| புகன்ற மாண் பொறி பொலிந்த சாந்தமொடு | ஆடவர்க்குரிய இலக்கணமாகக் கூறப்பட்ட மாட்சிமைப்பட்ட வரிகள் பொருந்தி, பொலிவுடன் திகழும் சந்தனத்துடன் |
| தண் கமழ் கோதை சூடி பூண் சுமந்து | குளிர்ந்த, மணங்கமழும் மாலையைச் சூடி, அணிகலன்களைப் பூண்டு, |
| திருவில் குலைஇ திரு மணி புரையும் | வானவில்லை வளைத்து, அழகிய நீல மணி போன்ற, |
| உரு கெழு கருவிய பெரு மழை சேர்ந்து | அச்சந்தரும் இடிமின்னலோடு கூட்டமாய்ச் சேர்ந்த பெரிய மேகங்கள் ஒன்றுசேர, |
| வேங்கை விரிந்து விசும்பு உறு சேண் சிமை | வேங்கைப்பூக்கள் மலர்ந்திருக்க, விண்ணைத்தொடும் தொலைவிலுள்ள சிகரத்திலிருந்து விழும் |
| அருவி அரு வரை அன்ன மார்பின் | அருவியையுடைய அரிய மலையைப் போன்ற மார்பினையுடையவனாய் – |
| சேண் நாறு நல் இசை சே_இழை கணவ | நெடுந்தொலைவுக்கும் சென்று மணம்வீசும் நல்ல புகழைக்கொண்ட செம்மையான இழைகளை அணிந்தவளுக்குக் கணவனே! |
| மாகம் சுடர மா விசும்பு உகக்கும் | – திசைகளெல்லாம் ஒளியால் விளங்க கரிய வானத்தில் உயரே எழுகின்ற |
| ஞாயிறு போல விளங்குதி பல் நாள் | ஞாயிற்றைப் போல சிறப்புடன் வாழ்வாயாக, பல நாட்கள்; |
| ஈங்கு காண்கு வந்தனென் யானே | இங்கு காண வந்திருக்கிறேன் நான், |
| உறு கால் எடுத்த ஓங்கு வரல் புணரி | பெரிய காற்றினால் எழுந்து, ஓங்கி உயர்ந்து வரும் அலை, |
| நுண் மணல் அடைகரை உடைதரும் | நுண்ணிய மணலையுடைய அடைத்தகரையில் மோதி உடைந்துபோகும் |
| தண் கடல் படப்பை நாடு கிழவோயே | குளிர்ந்த கடலோரப் பகுதிகளைக் கொண்ட நாட்டுக்கு உரியவனே! |
| # 89 பாட்டு 89 | # 89 பாட்டு 89 |
| வானம் பொழுதொடு சுரப்ப கானம் | மழை உரிய காலத்தில் பொழிய, காடுகளில் |
| தோடு உறு மட மான் ஏறு புணர்ந்து இயல | கூட்டமான இளைய மான்கள் தத்தம் ஆணோடு கூடி இனிதிருக்க, |
| புள்ளும் மிஞிறும் மா சினை ஆர்ப்ப | பறவைகளும் வண்டினமும் பெரிய மரக்கிளைகளிலிருந்து ஆரவாரிக்க, |
| பழனும் கிழங்கும் மிசை அறவு அறியாது | பழங்களும், கிழங்குகளும் உண்பதால் தீர்ந்துபோகாமலிருக்க, |
| பல் ஆன் நன் நிரை புல் அருந்து உகள | பலவாகிய பசுவின் நல்ல கூட்டம் புல்லை மேய்ந்து துள்ளி மகிழ, |
| பயம் கடை அறியா வளம் கெழு சிறப்பின் | எல்லையறியாப் பயன்களைக் கொண்ட வளம் பொருந்திய சிறப்பினால், |
| பெரும் பல் யாணர் கூலம் கெழும | பெரிய அளவில் பலவகையான புதுப்புது தானியங்கள் நிறைந்திருக்க, |
| நன் பல் ஊழி நடுவு நின்று ஒழுக | நல்ல பலவான ஊழிக்காலமாய் வளங்கள் நிறைவும், குறைவும் இன்றி நிலைபெற்றிருக்க, |
| பல் வேல் இரும்பொறை நின் கோல் செம்மையின் | பலவான வேற்படையை உடைய இரும்பொறையே! உனது செங்கோலாட்சி செம்மையாக நடைபெறுவதால் |
| நாளின்_நாளின் நாடு தொழுது ஏத்த | நாள்தோறும் நாட்டு மக்களெல்லாம் உன்னைத் தொழுது புகழ, |
| உயர்_நிலை_உலகத்து உயர்ந்தோர் பரவ | விண்ணுலகில் இருக்கும் உயர்ந்தவர்கள் உன்னைப் போற்றிப் பாட, |
| அரசியல் பிழையாது செரு மேந்தோன்றி | – அரசுமுறையில் பிழையாமல், போரில் வெற்றியால் மேம்பட்டு, |
| நோய் இலை ஆகியர் நீயே நின்_மாட்டு | நோயின்றி இருப்பாயாக நீயே! உன்னிடத்தில் |
| அடங்கிய நெஞ்சம் புகர்படுபு அறியாது | அன்புகொண்டு அடங்கிய நெஞ்சம் குற்றப்படுதலை அறியாமல், |
| கனவினும் பிரியா உறையுளொடு தண்ணென | கனவிலும் பிரியாத வாழ்க்கையோடு, குளிர்ச்ச்சியுண்டாக |
| தகரம் நீவிய துவரா கூந்தல் | மணம்வீசும் கலவைகள் பூசிய எண்ணெய்ப்பசை நீங்காத கூந்தலையுடைய |
| வதுவை மகளிர் நோக்கினர் பெயர்ந்து | மணமகளிர் திருமணநாளில் பார்த்துப் பின்னரும் |
| வாழ்நாள் அறியும் வயங்கு சுடர் நோக்கத்து | தம் வாழ்நாளை உறுதிசெய்துகொள்ளும் ஒளிர்கின்ற சுடர் போன்ற தோற்றத்தையுடைய |
| மீனொடு புரையும் கற்பின் | அருந்ததி என்ற விண்மீனைப் போன்ற கற்பினையுடைய |
| வாள் நுதல் அரிவையொடு காண்வர பொலிந்தே | ஒளிபொருந்திய நெற்றியையுடைய உன் மனைவியுடன் அழகுற விளங்கி – |
| # 90 பாட்டு 90 | # 90 பாட்டு 90 |
| மீன் வயின் நிற்ப வானம் வாய்ப்ப | நாள் மீன்களும், கோள்மீன்களும் தத்தம் இடத்தில் நிற்க, மழை பொய்க்காமல் பொழிய, |
| அச்சு அற்று ஏமம் ஆகி இருள் தீர்ந்து | அச்சமே இல்லாமற்போய், பாதுகாப்பு உணர்வு பெருக, துன்பம் தீர்ந்து |
| இன்பம் பெருக தோன்றி தம் துணை | இன்பம் பெருகத் தோன்றி, தமக்கு அளவாக வகுக்கப்பட்ட |
| துறையின் எஞ்சாமை நிறைய கற்று | துறைகளையெல்லாம் மீதமின்றி நிறையக் கற்று, |
| கழிந்தோர் உடற்றும் கடும் தூ அஞ்சா | வலிமையில் மிகுந்தோர் சினமூட்டும் போரின் கடுமையான வன்மைக்கு அஞ்சாத |
| ஒளிறு வாள் வய வேந்தர் | ஒளிவிடும் வாளையுடைய வலிய வேந்தர்கள் |
| களிறொடு கலம் தந்து | களிறுகளோடு கலன்கள் பலவற்றையும் தந்து |
| தொன்று மொழிந்து தொழில் கேட்ப | தமது பழைமையைச் சொல்லிப் பணிந்து நடக்க, |
| அகல் வையத்து பகல் ஆற்றி | அகன்ற நிலவுலகில் நடுவுநிலைமையை நிலைநிறுத்தி, |
| மாயா பல் புகழ் வியல் விசும்பு ஊர்தர | அழியாத, பலவகையில் சிறந்த புகழ், அகன்ற வானமெங்கும் பரவ, |
| வாள் வலியுறுத்து செம்மை பூஉண்டு | தன் வாள் வலிமை தெரியக் காட்டி, செங்கோன்மை மேற்கொண்டு |
| அறன் வாழ்த்த நற்கு ஆண்ட | அறவோர் வாழ்த்த, நன்றாக ஆண்ட |
| விறல் மாந்தரன் விறல் மருக | வெற்றியையுடைய மாந்தரன் என்பவனின் சிறந்த வழித்தோன்றலே! |
| ஈரம் உடைமையின் நீர் ஓர் அனையை | நெஞ்சிலே இரக்கம் கொண்டிருப்பதால் தண்ணீரின் தன்மையைப் போன்றிருக்கிறாய்; |
| அளப்பு அருமையின் இரு விசும்பு அனையை | உன் திறனை அளப்பதற்கு அரிது என்பதால் பெரிய விசும்பினைப் போன்றிருக்கிறாய்; |
| கொள குறைபடாமையின் முந்நீர் அனையை | இரவலர் எடுத்துக்கொள்ள குறைவுபடாதிருப்பதால் கடலைப் போன்றிருக்கிறாய்; |
| பல் மீன் நாப்பண் திங்கள் போல | பல விண்மீன்களின் நடுவே விளங்கும் திங்களைப் போல |
| பூத்த சுற்றமொடு பொலிந்து தோன்றலை | மலர்ந்த சுற்றத்தாரோடு பொலிவுடன் திகழ்கிறாய்; |
| உரு கெழு மரபின் அயிரை பரவியும் | அச்சந்தரும் மரபினையுடைய அயிரை மலையிலிருக்கும் கொற்றவையைப் போற்றித் துதித்தும், |
| கடல் இகுப்ப வேல் இட்டும் | கடற்பகைவர் தாழ்ச்சியுற வேற்படையைச் செலுத்தியும், |
| உடலுநர் மிடல் சாய்த்தும் | சினந்து வந்தவரின் வலிமையை அழித்தும், |
| மலையவும் நிலத்தவும் அருப்பம் வௌவி | மலையிலும், நிலத்திலும் பகைவரின் அரண்களைக் கைப்பற்றி, |
| பெற்ற பெரும் பெயர் பலர் கை இரீஇய | அங்குப் பெற்ற பெருமளவு பொருளைப் பலருக்கும் வழங்கியும், |
| கொற்ற திருவின் உரவோர் உம்பல் | வெற்றியும் செல்வமும் பெற்றிருக்கும் உரமுடைய முன்னோர்களின் வழித்தோன்றலே! |
| கட்டி புழுக்கின் கொங்கர் கோவே | சர்க்கரைக் கட்டியுடன் அவரை விதைகளை வேகவைத்து உண்ணும் கொங்கர்களின் அரசனே! |
| மட்ட புகாவின் குட்டுவர் ஏறே | கள்ளுடன் கூடிய உணவினையுடைய குட்டுவரின் தலைவனே! |
| எழாஅ துணை தோள் பூழியர் மெய்ம்மறை | தம்மிடம் தோற்றவரிடம் போர்க்கு எழாத இரு தோள்களையுடைய பூழியருக்குக் கவசம் போன்றவனே! |
| இரங்கு நீர் பரப்பின் மரந்தையோர் பொருந | ஒலிக்கின்ற கடற்பரப்பைக் கொண்ட மரந்தை நகரத்தாரின் பொருநனே! |
| வெண் பூ வேளையொடு சுரை தலைமயக்கிய | வெள்ளையான பூவைக்கொண்ட வேளைக் கொடியுடன் சுரைக்கொடியும் பின்னிக்கிடக்கும் |
| விரவு மொழி கட்டூர் வயவர் வேந்தே | பல்வேறு மொழிகளைப் பேசுவோர் கலந்திருக்கும் பாடிவீடுகளில் இருக்கும் வீரர்களுக்கு வேந்தனே! |
| உரவு கடல் அன்ன தாங்கு அரும் தானையொடு | மிகுந்த பரப்பினைக் கொண்ட கடலைப் போன்ற தடுப்பதற்கு முடியாத சேனையுடன், |
| மாண் வினை சாபம் மார்பு உற வாங்கி | சிறந்த வேலைப்பாட்டையுடைய வில்லை மார்பினைத் தொடுமாறு இழுத்து வளைக்கும்போது |
| ஞாண் பொர விளங்கிய வலி கெழு தட கை | வில்லின் நாண் தேய்ப்பதால் ஒளிர்ந்து பிரகாசிக்கும் வலி பொருந்திய பெரிய கையினையும், |
| வார்ந்து புனைந்து அன்ன ஏந்து குவவு மொய்ம்பின் | நீண்டு ஒப்பனை செய்ததைப் போன்ற உயர்ந்த திரண்ட தோளினையும் கொண்டு, |
| மீன் பூத்து அன்ன விளங்கு மணி பாண்டில் | விண்மீன் பூத்திருப்பதைப் போன்ற ஒளி விளங்கும் மணிகள் தைக்கபெற்ற சேணத்தையும், |
| ஆய் மயிர் கவரி பாய்_மா மேல்கொண்டு | அழகிய கவரி மயிராலாகிய தலையாட்டத்தையும் உடைய பாய்ந்து செல்லும் குதிரையின் மேலேறி |
| காழ் எஃகம் பிடித்து எறிந்து | காம்பையுடைய வேலினைப் பிடித்துப் பகைவர் மீது எறிந்து |
| விழுமத்தின் புகலும் பெயரா ஆண்மை | அவர் எய்தும் துன்பத்தையே மேலும் விரும்புகின்ற நீங்காத ஆண்மையினையுடைய – |
| காஞ்சி சான்ற வயவர் பெரும | நிலையாமையை நெஞ்சிற்கொண்ட வீரர்களின் – பெருமானே! |
| வீங்கு பெரும் சிறப்பின் ஓங்கு புகழோயே | பெருகிவரும் பெரும் சிறப்பினால் உயர்ந்த புகழைக் கொண்டவனே! |
| கழனி உழவர் தண்ணுமை இசைப்பின் | வயல்வெளிகளிலிருக்கும் உழவர்கள் தண்ணுமையை முழக்கினால் |
| பழன மஞ்ஞை மழை செத்து ஆலும் | நீர்நிலைகளில் வாழும் மயில்கள் மேகங்களின் முழக்கம் என்று எண்ணி ஆடுகின்ற, |
| தண் புனல் ஆடுநர் ஆர்ப்பொடு மயங்கி | குளிர்ந்த நீரில் ஆடுவோர் செய்யும் ஆரவார ஒலியுடன் கலந்து, |
| வெம் போர் மள்ளர் தெண் கிணை கறங்க | கொடிய போரைச் செய்யும் வீரர்களின் தெளிந்த ஓசையமைந்த கிடாரிப்பறை ஒலிக்கின்ற, |
| கூழ் உடை நல் இல் ஏறு மாறு சிலைப்ப | செல்வமுடைய நல்ல இல்லங்களில் காளைகள் தம்முள் மாறுபட்டு செருக்கி முழங்குகின்ற, |
| செழும் பல இருந்த கொழும் பல் தண் பணை | செழுமையான பல ஊர்களையுடைய, வளம் மிக்க பல குளிர்ந்த வயல்களைக் கொண்ட, |
| காவிரி படப்பை நன் நாடு அன்ன | காவிரியாற்றால் வளம்பெறும் நிலப்பகுதிகளைக் கொண்ட, நல்ல சோழநாட்டைப் போன்றவளும், |
| வளம் கெழு குடைச்சூல் அடங்கிய கொள்கை | தொழில்வளம் பொருந்திய சிலம்பையும், அடக்கமே கொள்கையாகவும், |
| ஆறிய கற்பின் தேறிய நல் இசை | சினமற்ற கற்பினையும், தெளிவாய் விளங்கும் நல்ல புகழையும் |
| வண்டு ஆர் கூந்தல் ஒண்_தொடி கணவ | வண்டு மொய்க்கும் கூந்தலையும், ஒளிவிடும் தொடிகளையும் உடையவளுக்குக் கணவனே! |
| நின் நாள் திங்கள் அனைய ஆக திங்கள் | உனது ஒருநாள் ஒரு மாதத்தைப் போல் இருப்பதாக, உனது ஒரு மாதம் |
| யாண்டு ஓர் அனைய ஆக யாண்டே | ஓர் ஆண்டைப் போல் இருப்பதாக, உனது ஓர் ஆண்டு |
| ஊழி அனைய ஆக ஊழி | ஓர் ஊழியைப் போல் இருப்பதாக, உனது ஓர் ஊழி |
| வெள்ள வரம்பின ஆக என உள்ளி | பேரெண்ணாகிய வெள்ளம் என்பதன் எல்லையாக இருப்பதாக என்று நினைத்து வாழ்த்தி |
| காண்கு வந்திசின் யானே செரு மிக்கு | உன்னைக் காண வந்திருக்கிறேன் நான்; போர்க்காலத்தில் மேம்பட்டு |
| உரும் என முழங்கும் முரசின் | இடியைப் போல முழங்கும் முரசினையும், |
| பெரு நல் யானை இறை கிழவோயே | பெரிய நல்ல யானைகளையும் உடைய இறைத்தன்மைக்குரியவனே! |
| பதிற்றுப்பத்தில் | பதிற்றுப்பத்தில் |
| முதல் பத்தும் (1 – 10) இறுதிப் பத்தும் (91 – 100) | முதல் பத்தும் (1 – 10) இறுதிப் பத்தும் (91 – 100) |
| கிடைக்கவில்லை. | கிடைக்கவில்லை. |
| தொல்காப்பியப் பொருளதிகார உரையிலும் | தொல்காப்பியப் பொருளதிகார உரையிலும் |
| புறத்திரட்டிலும் காணப்பட்ட சில பாடல்களும் | புறத்திரட்டிலும் காணப்பட்ட சில பாடல்களும் |
| பாடல் வரிகளும் இடம் விளங்காத பாடல்கள் | பாடல் வரிகளும் இடம் விளங்காத பாடல்கள் |
| என்ற தலைப்பில் தொகுக்கப்பட்டுள்ளன. | என்ற தலைப்பில் தொகுக்கப்பட்டுள்ளன. |
| அவற்றுக்கு இங்கே ஆசிரியரால் | அவற்றுக்கு இங்கே ஆசிரியரால் |
| எண்கள் கொடுக்கப்பட்டுள்ளன. | எண்கள் கொடுக்கப்பட்டுள்ளன. |
| # 91 | # 91 |
| இரும் கண் யானையொடு அரும் கலம் தெறுத்து | இரும் கண் யானையொடு அரும் கலம் தெறுத்து |
| பணிந்து வழிமொழிதல் அல்லது பகைவர் | பணிந்து வழிமொழிதல் அல்லது பகைவர் |
| வணங்கார் ஆதல் யாவதோ மற்றே | வணங்கார் ஆதல் யாவதோ மற்றே |
| உரும் உடன்று சிலைத்தலின் விசும்பு அதிர்ந்து ஆங்கு | உரும் உடன்று சிலைத்தலின் விசும்பு அதிர்ந்து ஆங்கு |
| கண் அதிர்பு முழங்கும் கடும் குரல் முரசமொடு | கண் அதிர்பு முழங்கும் கடும் குரல் முரசமொடு |
| கால் கிளர்ந்து அன்ன ஊர்தி கால் முளை | கால் கிளர்ந்து அன்ன ஊர்தி கால் முளை |
| எரி நிகழ்ந்து அன்ன நிறை அரும் சீற்றத்து | எரி நிகழ்ந்து அன்ன நிறை அரும் சீற்றத்து |
| நளி இரும் பரப்பின் மா கடல் முன்னி | நளி இரும் பரப்பின் மா கடல் முன்னி |
| நீர் துனைந்து அன்ன செலவின் | நீர் துனைந்து அன்ன செலவின் |
| நிலம் திரைப்பு அன்ன தானையோய் நினக்கே | நிலம் திரைப்பு அன்ன தானையோய் நினக்கே |
| # 92 | # 92 |
| இலங்கு தொடி மருப்பின் கடாஅம் வார்ந்து | இலங்கு தொடி மருப்பின் கடாஅம் வார்ந்து |
| நிலம் புடையூ எழுதரும் வலம்படு குஞ்சரம் | நிலம் புடையூ எழுதரும் வலம்படு குஞ்சரம் |
| எரி அவிழ்ந்து அன்ன விரி உளை சூட்டி | எரி அவிழ்ந்து அன்ன விரி உளை சூட்டி |
| கால் கிளர்ந்து அன்ன கடும் செலவு இவுளி | கால் கிளர்ந்து அன்ன கடும் செலவு இவுளி |
| கோல் முனை கொடி இனம் விரவா வல்லோடு | கோல் முனை கொடி இனம் விரவா வல்லோடு |
| ஊன் வினை கடுக்கும் தோன்றல பெரிது எழுந்து | ஊன் வினை கடுக்கும் தோன்றல பெரிது எழுந்து |
| அருவியின் ஒலிக்கும் வரி புனை நெடும் தேர் | அருவியின் ஒலிக்கும் வரி புனை நெடும் தேர் |
| கண் வேட்டனவே முரசம் கண் உற்று | கண் வேட்டனவே முரசம் கண் உற்று |
| கதித்து எழு மாதிரம் கல்லென ஒலிப்ப | கதித்து எழு மாதிரம் கல்லென ஒலிப்ப |
| கறங்கு இசை வயிரொடு வலம் புரி ஆர்ப்ப | கறங்கு இசை வயிரொடு வலம் புரி ஆர்ப்ப |
| நெடு மதில் நிரை ஞாயில் | நெடு மதில் நிரை ஞாயில் |
| கடி மிளை குண்டு கிடங்கின் | கடி மிளை குண்டு கிடங்கின் |
| மீ புடை ஆர் அரண் காப்பு உடை தேஎம் | மீ புடை ஆர் அரண் காப்பு உடை தேஎம் |
| நெஞ்சு புகல் அழிந்து நிலை தளர்பு ஒரீஇ | நெஞ்சு புகல் அழிந்து நிலை தளர்பு ஒரீஇ |
| ஒல்லா மன்னர் நடுங்க | ஒல்லா மன்னர் நடுங்க |
| நல்ல மன்ற இவண் வீங்கிய செலவே | நல்ல மன்ற இவண் வீங்கிய செலவே |
| # 93 | # 93 |
| பேணு_தகு சிறப்பின் பெண் இயல்பு ஆயினும் | பேணு_தகு சிறப்பின் பெண் இயல்பு ஆயினும் |
| என்னொடு புரையுநள் அல்லள் | என்னொடு புரையுநள் அல்லள் |
| தன்னொடு புரையுநர் தான் அறிகுநளே | தன்னொடு புரையுநர் தான் அறிகுநளே |
| # 94 | # 94 |
| வந்தனென் பெரும கண்டனென் செலற்கே | வந்தனென் பெரும கண்டனென் செலற்கே |
| களிறு கலி_மான் தேரொடு சுரந்து | களிறு கலி_மான் தேரொடு சுரந்து |
| நன் கலன் ஈயும் நகை சால் இருக்கை | நன் கலன் ஈயும் நகை சால் இருக்கை |
| மாரி என்னாய் பனி என மடியாய் | மாரி என்னாய் பனி என மடியாய் |
| பகை வெம்மையின் அசையா ஊக்கலை | பகை வெம்மையின் அசையா ஊக்கலை |
| வேறு புலத்து இறுத்த விறல் வெம் தானையொடு | வேறு புலத்து இறுத்த விறல் வெம் தானையொடு |
| மாறா மைந்தர் மாறு நிலை தேய | மாறா மைந்தர் மாறு நிலை தேய |
| மைந்து மலி ஊக்கத்த கந்து கால் கீழ்ந்து | மைந்து மலி ஊக்கத்த கந்து கால் கீழ்ந்து |
| கடாஅ யானை முழங்கும் | கடாஅ யானை முழங்கும் |
| இடாஅ ஏணி நின் பாசறை யானே | இடாஅ ஏணி நின் பாசறை யானே |
முனைவர் ப.பாண்டியராஜா
M.Sc.,M.Phil.(Maths).,M.A(Tamil).,PGDCA.,Ph.D முன்னாள்: தலைவர், கணிதத்துறை, இயக்குநர், கணினித் துறை, துணை முதல்வர், அமெரிக்கன் கல்லூரி, மதுரை, தமிழ்நாடு 37 ஆண்டுகள் அமெரிக்கன் கல்லூரியில் ஆசிரியப்பணி (1964 – 2001)மேலும்…